جاساندى ينتەللەكت كومەگىمەن تۇسىرىلگەن فيلمدەردىڭ حالىقارالىق فەستيۆالى — Astana AI Film Festival-عا الەمنىڭ 90 ەلىنەن 1900-دەن استام ءوتىنىم ءتۇستى. بۇل فەستيۆال قورىنىڭ قامقورشىلىق كەڭەسىنىڭ وتىرىسىندا بەلگىلى بولدى. وندا كونكۋرستىق باعدارلاما، Astana Digital Bridge اياسىنداعى ءىس-شارانى دايىنداۋ، سونداي-اق استانانىڭ قاتىسۋشىلار مەن قوناقتاردى قابىلداۋعا دايىندىعى تالقىلاندى، دەپ حابارلايدى infohub.kz.
ەڭ كوپ جۇمىس اقش-تان ءتۇستى — بۇل بارلىق ءوتىنىمنىڭ 17%-ى. ەكىنشى ورىندا ءۇندىستان — 10%، قازاقستان — 8%. وڭتۇستىك كورەيا مەن قىتايعا 5%-دان، ۇلىبريتانياعا 4%، رەسەي مەن گونكونگقا 3%-دان تيەسىلى.
ۇيىمداستىرۋشىلاردىڭ ايتۋىنشا، وتىنىمدەردىڭ كەڭ گەوگرافياسى كاسىبي قاۋىمنىڭ كينو ونەرىندە جاساندى ينتەللەكتتى قولدانۋعا دەگەن قىزىعۋشىلىعىنىڭ ارتىپ كەلە جاتقانىن كورسەتەدى.
فەستيۆالدىڭ حالىقارالىق قازىلار القاسىنا يۋنەسكو-نىڭ بۇرىنعى باس ديرەكتورى ودرە ازۋلە، China Film Group وكىلى ما پين جانە پەكين كينواكادەمياسىنىڭ وكىلى ۆان حاو كىردى. Astana AI Film Festival-دىڭ باس سەرىكتەسى — Freedom Holding Corp.
Astana AI Film Festival 2026 جىلدىڭ 1-3 قازانى ارالىعىندا استانادا Astana AI Week اياسىندا وتەدى. باس كونكۋرس «The future worth living in» — «ءومىر سۇرۋگە تۇرارلىق بولاشاق» تاقىرىبىندا وتەدى. جۇلدە قورى — 1 ميلليون دوللار.
نەگىزگى كونكۋرستان بولەك، بەس نوميناسيادان تۇراتىن اشىق سەكسيا قاراستىرىلعان. وتىنىمدەردى قابىلداۋ تامىز ايىنىڭ سوڭىنا دەيىن جالعاسادى.
فەستيۆالدىڭ رەسمي باعدارلاماسىنداعى فيلمدەر العاش رەت استاناداعى Chaplin كينوتەاترىنىڭ ۇلكەن ەكرانىندا كورسەتىلەدى. ىسكەرلىك باعدارلاما Digital Bridge فورۋمى اياسىندا ءوتىپ، جاساندى ينتەللەكت، كينو جانە سيفرلىق شىعارماشىلىق سالاسىنداعى حالىقارالىق ساراپشىلاردىڭ قاتىسۋىمەن پلەنارلىق جانە پانەلدىك سەسسيالار، ۆوركشوپتار مەن شەبەرلىك سىنىپتارىن قامتيدى.
وتىرىسقا قاتىسۋشىلار قىتايمەن ىنتىماقتاستىقتى ەرەكشە اتاپ ءوتتى. AI-كينو سالاسىنداعى قازاقستان-قىتاي يننوۆاسيالىق الماسۋ فورۋمىنىڭ قورىتىندىسى بويىنشا Astana AI Film Festival قورى Beijing Zhongguancun Tongli Technology Service Co.، Ltd. كومپانياسىمەن مەموراندۋمعا قول قويدى. قىتايلىق كومپانيا فەستيۆالدىڭ قحر-داعى رەسمي وكىلى بولدى.
فەستيۆالدى وتكىزۋ مەملەكەت باسشىسى قاسىم-جومارت توقايەۆ جاريالاعان 2026 جىلدى سيفرلاندىرۋ جانە جاساندى ينتەللەكت جىلى دەپ جاريالاۋىمەن بايلانىستىرىلۋدا.