استانادا اقىلى تۇراقتار رەسمي تۇردە اكىمدىك مەنشىگىنە ءوتتى. ەندى ولاردان تۇسكەن بارلىق كىرىس جەرگىلىكتى بيۋدجەتكە باعىتتالادى، دەپ حابارلايدى infohub.kz سايتى.
«جەتىنشى ارنا» حابارلاعانداي، جۇرگىزۋشىلەر ءۇشىن ازىرگە ەشتەڭە وزگەرگەن جوق: ءتارتىپ بۇرىنعىشا — تۇراقتادىڭ، تولەدىڭ، كەتتىڭ. باعاسى دا سول — ساعاتىنا 100 تەڭگە. ايىرماشىلىق تەك اقىلى تۇراقتاردان تۇسكەن بارلىق كىرىستىڭ ەندى جەرگىلىكتى بيۋدجەتكە جىبەرىلۋىندە. ال اكىمدىك ونىڭ ورنىنا كولىك تۇراعىنىڭ سانىن كوبەيتۋدى ۋادە ەتىپ وتىر.
«بۇگىنگى تاڭدا استانادا 530-نان استام تۇراق ايماعى جۇمىس ىستەپ تۇر، ولار 10 مىڭنان استام تۇراق ورنىنا ەسەپتەلگەن. قازىرگى ۋاقىتتا وسى تۇراق ورىندارىن 1 مىڭنان استام ورىنعا كوبەيتۋ قاراستىرىلۋدا. بۇل كەيبىر كوشە-جول جەلىسى ۋچاسكەلەرىندە سۇرانىستىڭ ارتۋىنا بايلانىستى»، — دەدى استانانىڭ جول قوزعالىسىن ۇيىمداستىرۋ ورتالىعى ديرەكتورىنىڭ ورىنباسارى رۋسلان ابدۋالييەۆ.
جاڭالىقتار تەك تۇراق سانىنا قاتىستى ەمەس. بارلىق ورىندى جاڭارتۋ جوسپارلانىپ وتىر، ال كولىكتى بەلگى سىزىعىنا كولدەنەڭ قويۋعا ەندى تىيىم سالىنادى. سونداي-اق جۇرگىزۋشىلەر ءۇشىن تۇراق ءنومىرى مەن ونىڭ كارتاداعى ورنىن بىردەن كورسەتەتىن جاڭا قوسىمشا ىسكە قوسىلدى. بۇرىنعى تولەم ادىستەرى مەن اقپاراتتىق تاقتالارداعى QR-كودتار وزگەرىسسىز قالادى.
جۇرگىزۋشىلەردىڭ جاڭالىققا كوزقاراسى ءارتۇرلى. بىرەۋلەر تۇراق ءۇشىن تولەنگەن اقشا بيۋدجەتكە ءتۇسۋى كەرەك دەسە، ەندى بىرەۋلەرى ورىن ءۇشىن اقى تولەۋدىڭ ءمانى جوق دەپ سانايدى.
«اقشا مەملەكەتكە، جەكە ادامعا ەمەس، بارادى. ولار ءبارىبىر ءبىر جەرگە جۇمسالاتىن شىعار»، — دەيدى ءبىر جۇرگىزۋشى.
«ءبىز تۇراقتايمىز، ءبارىن تولەيمىز. تۇراق ورىندارى اقىلى بولماسا ەكەن، ويتكەنى ءبىز ءۇشىن سونشا جەر اقىلى، مەنىڭشە، بۇل دۇرىس ەمەس»، — دەيدى ەكىنشىسى.
«مەنىڭشە، بۇل دۇرىس. تۇراق ءۇشىن بىزدەن الىناتىن اقشا كەرەك جەرگە بارادى. مەن بۇعان كەلىسەمىن»، — دەپ قولدايدى ءۇشىنشىسى.
الايدا «استانانىڭ تۇراق كەڭىستىگى» وسى جىلدار ىشىندە قانشا تابىس تاپقانىن اكىمدىك ايتپايدى. قايتا ۇيىمداستىرۋ ءالى ءجۇرىپ جاتقانىن، سوندىقتان ناقتى سوما جوق ەكەنىن اتاپ وتەدى. ءبىراق ەلوردا جۇرگىزۋشىلەرى ءۇشىن باستىسى ازىرگە وزگەرىسسىز قالىپ وتىر — تۇراق ءالى دە اقىلى، ال باسقارۋ جۇيەسى ەندى مەملەكەتتىك بولادى.
ەسكە سالايىق، 2025 جىلدىڭ جەلتوقسانىندا ەلوردا اكىمدىگى مەن «پاركوۆوچنوە پروسترانستۆو» ج ش س اراسىندا سەرىكتەستىكتىڭ 100% ۇلەسىن قالا اكىمدىگىنە تەگىن بەرۋ تۋرالى الدىن الا شارتقا قول قويىلعان بولاتىن. استانا اكىمى جەڭىس قاسىمبەك سول كەزدە اقىلى تۇراقتار اكىمدىككە وتكەننەن كەيىن جۇمىستىڭ قالاي قۇرىلاتىنىن ايتقان ەدى. ونىڭ سوزىنشە، كوپتەگەن ورىن مۇلدەم تەگىن بولادى.