استانادا ۆانداليزم فاكتىلەرى جيىلەپ كەتتى: بۇزاقىلاردىڭ ارەكەتىنەن ايالدامالار، ورىندىقتار، قوقىس جاشىكتەرى مەن مۇسىندەر زارداپ شەگۋدە. بۇل تۋرالى الەۋمەتتىك جەلىلەردە ەلوردا اكىمى جەڭىس قاسىمبەك جازدى، دەپ حابارلايدى infohub.kz سايتى.
ونىڭ ايتۋىنشا، استانادا بوتەن جانە كوممۋنالدىق م ۇلىكتى بۇلدىرگەنى ءۇشىن 143 ادام جاۋاپكەرشىلىككە تارتىلعان، ولاردىڭ اراسىندا كامەلەتكە تولماعاندار دا بار.
سونىمەن قاتار ەلوردادا قوعامدىق ورىنداردى لاستاۋعا بايلانىستى 928 اكىمشىلىك قۇقىقبۇزۋشىلىق تىركەلگەن.
«قالالىق ينفراقۇرىلىمدى بۇلدىرە وتىرىپ، بۇزاقىلار تەك قالاعا عانا زيان كەلتىرىپ قويماي، بارلىق تۇرعىن مەن ەلوردا قوناقتارىنا — سونىڭ ىشىندە كۇن سايىن وسى كوشەلەرمەن جۇرەتىن ءوز تۋىستارى مەن جاقىندارىنا دا قولايسىزدىق تۋعىزادى»، — دەپ جازدى قاسىمبەك.
اكىمنىڭ مالىمدەۋىنشە، پوليسيا كوشەلەردى كۇن سايىن پاترۋلدەپ، بۇزاقىلاردى انىقتاپ ءجۇر. قالادا بەينەباقىلاۋ كامەرالارىنىڭ سانى ارتىپ، ەسىرتكى جارناماسى بار گراففيتيلەر جويىلۋدا.
«زاڭعا سايكەس قوعامعا جات قىلىقتار قىلمىستىق جاۋاپكەرشىلىككە تارتۋعا دەيىن قاتاڭ جازالانادى. سونداي-اق كامەلەتكە تولماعان بۇزاقىلاردىڭ اتا-انالارى دا جاۋاپكەرشىلىككە تارتىلادى. بارلىق تۇرعىن مەن ەلوردا قوناقتارىن ءبىز ءوزىمىز، تۋىستارىمىز بەن جاقىندارىمىز تۇراتىن قالامىزعا ۇقىپتى قاراۋعا شاقىرامىن»، — دەدى اكىم.
بۇعان دەيىن «كۋرسيۆ» استاناداعى جۋرناليستەر اللەياسىندا ۆانداليزم جاسادى دەپ 18 جاستاعى جىگىت پەن جاسوسپىرىمگە كۇدىك سالىنعانىن جازعان. ال شىمكەنتتە ۆاندالدار جاڭا سكۆەردەگى شاحمات بەسەدكاسىن ءبۇلدىرىپ تاستاعان.