استانا تۇرعىنى الاياقتىق ءۇشىن كىنالى دەپ تانىلدى: ول TikTok ارقىلى انگلياعا جۇمىسقا ورنالاستىرۋدىڭ اتىمەن 10 قازاقستاندىقتى 1 ملن تەڭگەدەن استام سوماعا الداعان، دەپ حابارلايدى infohub.kz.
تەرگەۋ دەرەكتەرىنە سايكەس، ەر ادام TikTok-تا قازاقستاندىقتارعا انگليادان جۇمىس تابۋعا كومەكتەسۋ تۋرالى حابارلاندىرۋلار ورنالاستىرعان. استانا پروكۋراتۋراسىنىڭ مالىمەتىنشە، الەۋەتتى كليەنتتەرمەن حات جازىسۋ كەزىندە ول زاڭدى قىزمەتپەن اينالىسىپ جاتقانداي اسەر قالدىرعان: كەڭەس بەرىپ، ساۋالنامالار تولتىرۋعا باعىتتاپ، قۇجاتتاردى راسىمدەۋ پروسەسىن سۇيەمەلدەگەن. ودان كەيىن كۇدىكتى ازاماتتاردى جۇمىسقا ورنالاستىرۋ قىزمەتى ءۇشىن تولەم رەتىندە اقشا اۋدارۋعا كوندىرگەن.
اقشانى العان سوڭ، ول ءوز مىندەتتەمەلەرىن ورىنداماعان، ال جىمقىرىلعان قاراجاتتى ءوز قالاۋى بويىنشا جۇمساعان. الاياقتىق سحەمانىڭ سالدارىنان 10 ازامات زارداپ شەككەن. كەلتىرىلگەن ماتەريالدىق زالالدىڭ جالپى سوماسى 1 ملن تەڭگەدەن استى، دەپ اتاپ ءوتتى استانا قاداعالاۋ ورگانىندا.
سوت وتىرىسى بارىسىندا مەملەكەتتىك ايىپتاۋدى استانا پروكۋراتۋراسى قولدادى. سوتتالۋشىنىڭ كىناسى سوت زەرتتەگەن دالەلدەمەلەردىڭ جيىنتىعىمەن تولىق دالەلدەندى. جازا تاعايىنداۋ كەزىندە سوت كىنانى مويىنداۋى، سوتتالۋشىنىڭ وكىنۋى، ونىڭ سوتتالماعاندىعى، سونداي-اق كەلتىرىلگەن ماتەريالدىق زالالدى ەرىكتى تۇردە وتەگەنىن ەسكەردى.
سوت ۇكىمىمەن ەر ادامعا 3 جىل 6 اي باس بوستاندىعىن شەكتەۋ جازاسى تاعايىندالىپ، پروباسيالىق باقىلاۋ بەلگىلەندى. سونىمەن قاتار، سوتتالۋشىعا ءبىرقاتار مىندەتتەر جۇكتەلدى. وعان پروباسيا قىزمەتىن حاباردار ەتپەي تۇرعىلىقتى جەرى مەن جۇمىسىن وزگەرتۋگە، الكوگولدىك ىشىمدىكتەر ىشۋگە بايلانىستى ويىن-ساۋىق ورىندارىنا (سونىڭ ىشىندە مەيرامحانالار، بارلار مەن كافەلەر) بارۋعا تىيىم سالىندى، ال جۇمىسى بولماسا، ول جۇمىسسىز رەتىندە تىركەلۋى ءتيىس. سونداي-اق سوت تۇنگى ۋاقىتتا (ساعات 22:00-دەن 06:00-گە دەيىن) تۇرعىلىقتى جەرىنەن تىس جەردە بولۋعا شەكتەۋ قويدى. ەگەر سوتتالۋشىنىڭ تۇراقتى جۇمىسى نەمەسە وقۋ ورنى بولماسا، ول جازا مەرزىمى ىشىندە جىل سايىن 100 ساعات ءماجبۇرلى ەڭبەككە تارتىلۋعا ءتيىس.
استانا پروكۋراتۋراسى ازاماتتاردى شەتەلدەن جۇمىس ىزدەۋ كەزىندە ساق بولۋعا شاقىردى. ۆەدومستۆو بوس جۇمىس ورىندارى تۋرالى اقپاراتتى تەك رەسمي كوزدەردەن الۋدى، ليسەنزياسى بار كادرلىق اگەنتتىكتەرگە جۇگىنۋدى جانە ۋاكىلەتتى مەملەكەتتىك ورگانداردىڭ قىزمەتتەرىن پايدالانۋدى ۇسىنادى، وسىلايشا الاياقتاردىڭ قۇربانى بولماۋعا بولادى.