قازاقستان استاناسىندا بىرنەشە اۋداننىڭ شەكاراسىن ناقتىلاۋ جوسپارلانۋدا. بۇل تۋرالى استانا قالالىق ءماسليحاتىنىڭ وتىرىسىندا قالالىق ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى التىنبەك احمەتوۆ مالىمدەدى، دەپ حابارلايدى infohub.kz سايتى.
احمەتوۆتىڭ ايتۋىنشا، تۇزەتۋ بۇرىن شەكارالارى وزەن ارناسىمەن وتكەن جەكەلەگەن ۋچاسكەلەرگە قاتىستى. ناقتىلاۋ ناتيجەسىندە الماتى اۋدانىنىڭ اۋدانى 106 گەكتارعا — 8 518-دەن 8 412 گەكتارعا دەيىن ازايادى. سونداي-اق نۇرا اۋدانىنىڭ اۋماعى قىسقارادى: 18 927-دەن 18 516 گەكتارعا دەيىن.
سونىمەن قاتار، قالعان ءۇش اۋداننىڭ اۋماعى ۇلعايادى. ەسىل اۋدانى 20 431-دەن 20 518 گەكتارعا، سارىارقا اۋدانى 6 775-تەن 7 144 گەكتارعا، ال بايقوڭىر اۋدانى 18 129-دان 18 190 گەكتارعا كەڭەيەدى.
«وزگەرىستەر جەر كاداسترىنداعى مالىمەتتەردى جاڭارتۋ جانە اۋدانداردىڭ شەكارالارىن ناقتى دەرەكتەرگە سايكەستەندىرۋ ءۇشىن قاجەت»، — دەپ ءتۇسىندىردى احمەتوۆ.