19 قىركۇيەكتەن باستاپ استانادا ەلىمىزدىڭ وڭىرلەرىنەن كەلگەن فەرمەرلەر مەن وندىرۋشىلەر قاتىساتىن اۋىلشارۋاشىلىق جارمەڭكەلەرى باستالادى. ءونىم قازان ايىنىڭ سوڭىنا دەيىن دەمالىس كۇندەرى ساتىلادى، دەپ حابارلايدى infohub.kz سايتى.
ساۋدا «قازانات» يپپودرومىنىڭ اۆتوتۇراعىندا وتەدى. مەكەنجايى: قارقارالى تاس جولى، 1. جارمەڭكەلەر كەلۋشىلەر ءۇشىن ساعات 9:00-دەن 18:00-گە دەيىن اشىق بولادى.
جارمەڭكەلەردىڭ جۇمىس كەستەسى وڭىرلەر بويىنشا بىلاي بولىنگەن:
19–20 قىركۇيەك — قىزىلوردا جانە اتىراۋ وبلىستارى؛
26–27 قىركۇيەك — اباي، الماتى جانە ماڭعىستاۋ وبلىستارى؛
3–4 قازان — شىعىس قازاقستان جانە اقتوبە وبلىستارى؛
10–11 قازان — تۇركىستان جانە باتىس قازاقستان وبلىستارى؛
17–18 قازان — سولتۇستىك قازاقستان، پاۆلودار جانە ۇلىتاۋ وبلىستارى؛
24–25 قازان — قاراعاندى جانە قوستاناي وبلىستارى.
جارمەڭكە اياسىندا ەلوردا تۇرعىندارى مەن قوناقتارى ەت، بالىق، ءسۇت ونىمدەرى، باكالەيا، كوكونىس، جەمىس-جيدەك جانە وزگە دە وتاندىق تاۋارلاردى ساتىپ الا الادى.
كەلۋشىلەرگە قولايلى بولۋ ءۇشىن جارمەڭكە وتەتىن جەرگە اۆتوبۋس قاتىناسى ۇيىمداستىرىلادى. اتاپ ايتقاندا، №18، 37 جانە 303 باعىتتارى جۇرەدى.
اكىمدىك مالىمەتىنشە، بىلتىر وڭىرلىك اۋىلشارۋاشىلىق جارمەڭكەسىنە 17 وڭىردەن 600-دەن استام ءوندىرۋشى قاتىسقان. ونىڭ بارىسىندا 10 مىڭ توننادان استام ءونىم ساتىلعان.
بۇعان دەيىن «كۋرسيۆ» استانادا 12 جانە 13 قىركۇيەكتە تۇرعىندار اۋىلشارۋاشىلىق جارمەڭكەلەرىنەن ەت، كوكونىس، جەمىس-جيدەك، ءسۇت جانە ۇن ونىمدەرىن ساتىپ الا الاتىنىن حابارلاعان.