قازاقستان مەن تايلاند استانالارى اراسىندا تىكەلەي اۋە قاتىناسى جەلتوقساندا اشىلادى — استانادان بانگكوكقا رەيستەردى Air Astana اۋەكومپانياسى ورىنداي باستايدى، دەپ حابارلايدى infohub.kz سايتى.
قازاقستان كولىك مينيسترلىگىنىڭ مالىمەتىنشە، استانا — بانگكوك باعىتى بويىنشا ۇشۋلار 2026 جىلعى 11 جەلتوقساننان باستالادى. ولار اپتاسىنا ەكى رەت Airbus A321LR ۇشاقتارىمەن ورىندالادى.
بۇعان دەيىن قازاقستاننان تايلاندقا تەك الماتى مەن شىمكەنتتەن عانا جەتۋگە بولاتىن. ەندى وسى قالالارعا رەسپۋبليكا استاناسى دا قوسىلادى.
جاڭا اۋە باعىتى ىسكە قوسىلعان سوڭ قازاقستان مەن تايلاند اراسىنداعى رەيستەردىڭ جالپى سانى ءتورت باعىت بويىنشا اپتاسىنا 20-عا جەتەدى. ءقازىر تايلاندقا مىنا باعىتتار بويىنشا ۇشۋلار ورىندالادى: الماتى — پحۋكەت، 7 رەيس (Air Astana)؛ الماتى — بانگكوك، 9 رەيس (Air Astana — 6، Thai AirAsiaX — 3)؛ شىمكەنت — بانگكوك، 2 رەيس (SCAT).
«ەكى مەملەكەت استاناسى اراسىنداعى جاڭا باعىت تۋريستىك جانە ىسكەرلىك ساپارلار مۇمكىندىكتەرىن كەڭەيتىپ، قازاقستان مەن تايلاند اراسىنداعى بايلانىستى ودان ءارى نىعايتۋعا ىقپال ەتەدى»، — دەپ سەنەدى كولىك مينيسترلىگىندە.