استاناداعى تۇنگى كلۋبتاردىڭ بىرىندە پوليسەيلەر كۇشتى اسەر ەتەتىن زاتتاردىڭ ساتىلۋىن توقتاتتى. باردا ساتۋعا دايىن «شارلار» تابىلدى، دەپ حابارلايدى infohub.kz.
استانا پوليسيا دەپارتامەنتىنىڭ Instagram-پاراقشاسىندا جاريالانعان اقپاراتقا سايكەس، ەلوردانىڭ ويىن-ساۋىق مەكەمەلەرىنە جۇرگىزىلگەن رەيد كەزىندە پوليسەيلەر ەسىرتكىگە جاتپايتىن كۇشتى اسەر ەتەتىن زاتتاردىڭ زاڭسىز اينالىمىن انىقتادى.
«تۇنگى مەكەمەلەردىڭ بىرىندە «شارلار» دەپ اتالاتىن زاتتار تىكەلەي باردا ساتىلعان. ولاردى تۇتىنۋ ءۇشىن قوناقتارعا ارنايى بولمە بولىنگەن»، — دەلىنگەن حابارلامادا.
تەكسەرۋ كەزىندە پوليسيا قىزمەتكەرلەرى ءۇش باللوندى جانە ساتۋعا دايىن «شارلاردى» تاركىلەدى. ولاردى ساتۋعا مەكەمەنىڭ 22 جاستاعى اكىمشىسى قاتىسى بار ەكەنى انىقتالدى.
«وسى فاكتى بويىنشا قىلمىستىق ءىس قوزعالىپ، وقيعانىڭ بارلىق ءمان-جايى انىقتالۋدا»، — دەپ قوستى پوليسيادا. پوليسيا كۇشتى اسەر ەتەتىن زاتتاردىڭ زاڭسىز اينالىمى ءۇشىن قىلمىستىق جاۋاپكەرشىلىك بار ەكەنىن ەسكە سالدى.
«سانانى وزگەرتەتىن كەز كەلگەن زات پسيحيكا مەن دەنساۋلىققا ەلەۋلى ءقاۋىپ توندىرەدى. بارلىق انىقتالعان بۇزۋشىلىقتار قولدانىستاعى زاڭناما اياسىندا قاتاڭ تۇردە جولىن كەسىلەدى»، — دەپ ەسكەرتتى ۆەدومستۆو.