«استانا» باسكەتبول كلۋبى قارجىلاندىرۋدىڭ قىسقارۋىنا تاپ بولۋى مۇمكىن. كوماندا توڭىرەگىندەگى جاعدايعا قازاقستاننىڭ تۋريزم جانە سپورت مينيسترلىگىندە تۇسىنىكتەمە بەردى... دەپ حابارلايدى infohub.kz سايتى.
سپورت جانە دەنە شىنىقتىرۋدى دامىتۋ ىستەرى كوميتەتىندە سوڭعى جىلدارى «استانانىڭ» ناتيجەلەرى قويىلعان مىندەتتەرگە سايكەس كەلمەگەنىن اتاپ ءوتتى. اسىرەسە، ۆتب ءبىرىڭعاي ليگاسىنىڭ وتكەن ماۋسىمى ءساتسىز بولدى: كوماندا 44 ويىندا نەبارى ەكى جەڭىسكە جەتىپ، سوڭعى، 12-ورىندى يەلەندى.
جەڭىلىس پايىزى 95%-دان استى — بۇل كلۋبتىڭ ليگاداعى ونەر كورسەتۋ تاريحىنداعى ەڭ ناشار كورسەتكىش. سونىمەن قاتار، سەگىز جىل بويى «استانا» ءتۋرنيردىڭ پلەي-وففىنا وتە المادى.
كوماندا ىشكى ارەنادا دا تابىسقا جەتە المادى: قازاقستان كۋبوگى ءۇشىن كۇرەستە جەڭىلىپ، ۇلتتىق ليگانىڭ چەمپيوندىق اتاعىن يەلەنە المادى.
سپورت مينيسترلىگىندە بىلتىر سپورتتى قارجىلاندىرۋ تيىمدىلىگىن ارتتىرۋعا باعىتتالعان زاڭ قابىلدانعانىن ەسكە سالدى. نەگىزگى باسىمدىقتاردىڭ قاتارىندا — ۇلتتىق قۇرامالاردى دامىتۋ، سپورت رەزەرۆىن دايىنداۋ جانە بيۋدجەت ەسەبىنەن لەگيونەرلەردى قارجىلاندىرۋدان باس تارتۋ.
«قالىپتاسقان جاعدايدا وتاندىق باسكەتبولدى دامىتۋ تاسىلدەرىن قايتا قاراۋ مۇمكىندىگى قاراستىرىلۋدا. باسىمدىق جاستار كومانداسىن دامىتۋعا، سپورت رەزەرۆىن دايىنداۋعا جانە بالالار-جاسوسپىرىمدەر سپورتىن قولداۋعا بەرىلەتىن بولادى»، — دەپ مالىمدەدى ۆەدومستۆودا.
قازاقستاننىڭ ۇلتتىق باسكەتبول فەدەراسياسىندا «استانا» بك قارجىلاندىرۋدى قىسقارتۋ تۋرالى شەشىممەن تانىسقانىن جانە جاس قازاقستاندىق ويىنشىلاردى دامىتۋ باعىتىن قولدايتىنىن مالىمدەدى.
فەدەراسيادا سپورت مينيسترلىگىمەن، كلۋبپەن جانە باسقا دا مۇددەلى تاراپتارمەن ىنتىماقتاسۋعا دايىن ەكەندىكتەرىن اتاپ ءوتتى.
«ورتاق ماقسات — قازاقستاندىق باسكەتبولدىڭ باسەكەگە قابىلەتتىلىگىن ساقتاۋ، جاس تالانتتاردىڭ ودان ءارى دامۋىنا جاعداي جاساۋ جانە ەلدىڭ حالىقارالىق ارەنادا لايىقتى وكىلدىگىن قامتاماسىز ەتەتىن ءتيىمدى شەشىمدەردى تابۋ»، — دەلىنگەن فەدەراسيانىڭ مالىمدەمەسىندە.
وسى جىلدىڭ مامىر ايىندا «كۋرسيۆ» باسكەتبول «استاناسىنىڭ» بەيرۋتتاعى باتىس ازيا سۋپەرليگاسىنىڭ (WASL) بارلىق ماچتارىندا جەڭىلگەنىن جازعان بولاتىن. وسى ايادا ەلوردالىق كلۋب باسشىلىعى كوماندانىڭ ۆتب ءبىرىڭعاي ليگاسىنىڭ كەلەسى ماۋسىمىن وتكىزىپ جىبەرەتىنىن حابارلادى.