استانانىڭ بايقوڭىر اۋدانىنداعى بازارلاردىڭ بىرىندە تاندىر سامساسىن دايىندايتىن جەردە جارىلىس بولدى. وقيعا سالدارىنان ءتورت ادام، سونىڭ ىشىندە ءبىر بالا، زارداپ شەكتى. بۇل تۋرالى infohub.kz حابارلايدى.
توتەنشە جاعداي جيەنقۇلوۆا كوشەسىندەگى ەكى قاباتتى عيماراتتىڭ ءبىرىنشى قاباتىندا بولدى. تجم مالىمەتىنشە، گاز-اۋا قوسپاسىنىڭ جارىلىسى بولعان. سوققى تولقىنىنان توبە جابىنى مەن ەسىك ويىعى ءىشىنارا وپىرىلىپ ءتۇستى. الدىن الا بولجام بويىنشا، سەبەپ — كولەمى 50 ليتر بولاتىن كومپوزيتتى گاز باللونىنىڭ گەرمەتيكالىعىنىڭ بۇزىلۋى.
ەلوردالىق قوعامدىق دەنساۋلىق ساقتاۋ باسقارماسىنىڭ حابارلاۋىنشا، ەكى ەرەسەك ادام №1 كوپسالالى قالالىق اۋرۋحاناعا جات قىزىلدى، ءبىر بالا №2 كوپسالالى قالالىق بالالار اۋرۋحاناسىنا جەتكىزىلدى، ال تاعى ءبىر زارداپ شەككەن ادام تەكسەرۋدەن كەيىن امبۋلاتوريالىق ەمدەۋگە جىبەرىلدى. وقيعا ورنىندا تجم بولىمشەلەرى مەن جەدەل قىزمەتتەر جۇمىس ىستەپ جاتىر. جارىلىستىڭ ناقتى ءمان-جايى مەن سەبەپتەرى انىقتالۋدا.