الەمنىڭ باستى قالالارىنىڭ بىرىنە استانادان ۇشۋ وڭايىراق بولا ءتۇستى: Air China اۋەكومپانياسى قازاقستان استاناسىنان بەيجىڭگە رەيس جيىلىگىن اپتاسىنا التى رەتكە دەيىن ارتتىردى، دەپ حابارلايدى infohub.kz سايتى.
استانا حالىقارالىق اۋەجايىنىڭ ءباسپاسوز قىزمەتىنىڭ مالىمەتىنشە، تامىز ايىنىڭ باسىنان باستاپ Air China اۋەكومپانياسى استانا حالىقارالىق اۋەجايىنان بەيجىڭگە رەيس جيىلىگىن اپتاسىنا التى رەتكە دەيىن ارتتىرعان. ءۇش رەيس استانا — بەيجىڭ باعىتى بويىنشا تىكەلەي ورىندالسا، تاعى ۇشەۋى استانا — سيان — بەيجىڭ باعىتىمەن جۇزەگە اسىرىلادى.
«رەيس جيىلىگىنىڭ ارتۋىنا بايلانىستى قازاقستان استاناسىنىڭ تۇرعىندارى قىتايعا ساپارلارىن جوسپارلاۋدا كوبىرەك مۇمكىندىككە يە بولدى. ەندى ساياحاتشىلار ءوز جوسپارلارىنا قاراي ەڭ قولايلى نۇسقانى تاڭداي الادى: استانادان بەيجىڭگە تىكەلەي رەيسپەن ۇشۋ نەمەسە سيان ارقىلى جۇڭگو استاناسىنا بارۋ»، — دەلىنگەن حابارلامادا.
سونىمەن قاتار، ءباسپاسوز قىزمەتى رەيس سانىنىڭ ارتۋى تۋريستىك جانە ىسكەرلىك ساپارلار ءۇشىن ساياحات كۇندەرىن يكەمدى تاڭداۋعا مۇمكىندىك بەرەتىنىن اتاپ ءوتتى.
استانا — سيان — بەيجىڭ باعىتىنداعى رەيستەر دۇيسەنبى، سارسەنبى جانە جۇما كۇندەرى ورىندالادى. ال استانا — بەيجىڭ باعىتى بويىنشا — سەيسەنبى، بەيسەنبى جانە سەنبى كۇندەرى.