ەلوردا شەتىندە اباتتاندىرۋ ەرەجەلەرى بۇزىلدى: Howo ماركالى اۆتوبەتونوسمەسيتەل جۇرگىزۋشىسى بەتون قوسپاسىنىڭ قالدىعىن سۋ قورعاۋ ايماعىنىڭ ءدال وزىندە جۋىپ، ورتاق پايدالانىلاتىن اۋماقتى لاستادى. بۇل تۋرالى infohub.kz سايتى حابارلايدى.
وقيعا بەينەجازباعا ءتۇسىپ قالعان. NUR.KZء-تىڭ استانا قالالىق پوليسيا دەپارتامەنتىنە سىلتەمە جاساپ حابارلاۋىنشا، بۇل دەرەك بويىنشا جۇرگىزۋشىگە زاڭدا كوزدەلگەن شارالار قولدانىلدى — ول قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 505-بابىنىڭ 1-بولىگى بويىنشا اكىمشىلىك جاۋاپكەرشىلىككە تارتىلدى.
«Howo ماركالى اۆتوبەتونوسمەسيتەل جۇرگىزۋشىسى بەتون قوسپاسىنىڭ قالدىعىن سۋ قورعاۋ ايماعىنىڭ ءدال وزىندە جۋىپ، ورتاق پايدالانىلاتىن اۋماقتى لاستادى جانە بەلگىلەنگەن اباتتاندىرۋ ەرەجەلەرىن بۇزدى. بۇل دەرەك بويىنشا جۇرگىزۋشىگە زاڭدا كوزدەلگەن شارالار قولدانىلدى. ول قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 505-بابىنىڭ 1-بولىگى بويىنشا اكىمشىلىك جاۋاپكەرشىلىككە تارتىلدى»، — دەلىنگەن حابارلامادا.
ەلوردالىق پوليسيا ورتاق پايدالانىلاتىن اۋماقتاردىڭ، سونىڭ ىشىندە سۋ قورعاۋ ايماقتارىنىڭ قۇرىلىس قالدىقتارىن ۇيۋگە، قوقىس تاستاۋعا نەمەسە قۇرىلىس تەحنيكاسىن جۋۋعا ارنالماعانىن ەسكە سالدى.
«مۇنداي بۇزۋشىلىقتار قورشاعان ورتاعا زيان كەلتىرىپ، قالانىڭ سانيتارلىق جاعدايىنا تىكەلەي اسەر ەتەدى. وسىعان بايلانىستى رەيدتىك شارالار جالعاسادى»، — دەپ قوستى پوليسيا دەپارتامەنتىندە.
اعىمداعى جىلدىڭ باسىنان بەرى ورتاق پايدالانىلاتىن ورىنداردى لاستاعانى جانە اباتتاندىرۋ ەرەجەلەرىن بۇزعانى ءۇشىن 34 مىڭنان استام قۇقىق بۇزۋشى اكىمشىلىك جاۋاپكەرشىلىككە تارتىلعانى اتاپ ءوتىلدى.