استانادا ونداعان وتباسى باسپاناسىز قالۋ قاۋپىنە تاپ بولدى. قۇرىلىس كومپانياسىنىڭ باسشىلىعى ءبىر پاتەرلەردى بىرنەشە ادامعا ساتىپ جىبەرگەن، دەپ infohub.kz حابارلايدى.
استانادا ءبىر پاتەرلەردى بىرنەشە رەت ساتتى دەپ كۇدىككە ىلىنگەن قۇرىلىس كومپانياسىنىڭ باسشىلىعىنا قاتىستى قىلمىستىق ءىس بويىنشا تەرگەۋ اياقتالدى. ايىپتاۋ اكتىسى سوتقا جولداندى. تەرگەۋ دەرەگىنشە، جالپى شىعىن 4،5 ملرد تەڭگەدەن اسقان.
زارداپ شەككەندەردىڭ اراسىندا ماليكوۆتار وتباسى بار. ولار 2024 جىلى پاتەر ساتىپ الىپ، مامىلە راسىمدەپ، مەنشىك قۇقىعىن تىركەپ، پاتەرگە كىرىپ كەتكەن. ءبىراق بىرنەشە ايدان كەيىن پاتەرگە تىيىم سالىندى.
«پاتەر يەسىمەن ساتىپ الۋ-ساتۋ شارتىن جاسادىق. اقشانى تولىق تولەپ، مامىلەنى اياقتادىق. ەكى كۇننەن كەيىن eGov ارقىلى پاتەردە ەشقانداي شەكتەۋ جوق ەكەنى تۋرالى انىقتاما الدىق. پاتەر تازا، اتىمىزعا تىركەلدى. كىرىپ، جاڭا ءۇي تويىن وتكىزدىك. ءبىراق 2025 جىلدىڭ كۇزىندە پاتەرگە تىيىم سالىنعانىن بىلدىك»، — دەدى استانا تۇرعىنى سامات ماليكوۆ.
قىلمىستىق ءىس ماتەريالدارىنا سايكەس، ونداعان ساتىپ الۋشى وسىنداي جاعدايعا تاپ بولعان. زارداپ شەككەندەر رەتىندە 51 ادام جانە ءبىر زاڭدى تۇلعا تانىلعان. قۇجاتتاردا ساتۋشى رەتىندە «International Invest Company IIC» ج ش س كورسەتىلگەن.
«2025 جىلدىڭ 10 قاڭتارىندا مەن ءۇش پاتەر ساتىپ الدىم. كومپانياعا قولما-قول اقشا تولەدىم. اقشانى كومپانيا يەلەرى ءوز قولدارىمەن قابىلدادى. ولار اقشانى وزدەرى ساناپ، الىپ، ماعان ءۇش كەلىسىمشارت پەن ءۇش تولەم تاپسىرماسىن بەردى. سودان كەيىن قۇرىلىسقا رۇقسات، پايدالانۋعا بەرۋ اكتىسى، №2 نىسان سياقتى بارلىق قۇجاتتاردى كورسەتىپ، ءبارى زاڭدى ەكەنىن، پاتەرگە كىرىپ، جوندەۋ جۇمىستارىن جۇرگىزۋگە بولاتىنىن ايتتى»، — دەدى ول.
ەلوردالىق ەكونوميكالىق تەرگەۋ دەپارتامەنتىنىڭ مالىمەتىنشە، ءتورت ادام قىلمىستىق جاۋاپكەرشىلىككە تارتىلعان. تەرگەۋشىلەردىڭ پىكىرىنشە، شارتتار كومپانيا كەڭسەسىندە ايىپتالۋشىلاردىڭ قاتىسۋىمەن جاسالىپ، اقشا بەرىلگەن.
ۆەدومستۆو دەرەگىنشە، اقشا ولاردىڭ جەكە شوتتارىنا تۇسكەن، ءبىراق بۋحگالتەرلىك قۇجاتتاردا دا، بانك جۇيەسىندە دە بۇل اقشانىڭ كىمگە تيەسىلى ەكەنى كورىنبەگەن. تەرگەۋ بۇل سحەما سالىق تولەۋدەن جالتارۋعا مۇمكىندىك بەرگەن دەپ ەسەپتەيدى. سونداي-اق، ەكى جىل بويى ءبىر پاتەرلەردىڭ بىرنەشە ساتىپ الۋشىعا ساتىلعانى انىقتالعان.
«سوتقا دەيىنگى تەرگەۋ اياقتالىپ، ايىپتاۋ اكتىسىن استانا قالاسىنىڭ پروكۋراتۋراسى بەكىتتى، سودان كەيىن قىلمىستىق ءىس استانا قالاسىنىڭ قىلمىستىق ىستەر جونىندەگى اۋدانارالىق سوتىنا قاراۋعا جىبەرىلدى. سوتتالۋشىلار ق ر قك-نىڭ 189-بابى 4-بولىگى 2-تارماعى، 190-بابى 4-بولىگى 2-تارماعى جانە 399-بابى 1-بولىگىندە كوزدەلگەن قىلمىستىق قۇقىق بۇزۋشىلىقتاردى جاسادى دەپ ايىپتالۋدا»، — دەلىنگەن قۇقىق قورعاۋ ورگاندارىنىڭ حابارلاماسىندا.
استانا پروكۋراتۋراسى ايىپتاۋ ۇكىمى شىققان جاعدايدا فيگۋرانتتارعا 5-تەن 12 جىلعا دەيىن باس بوستاندىعىنان ايىرۋ جازاسى تاعايىندالۋى مۇمكىن ەكەنىن ايتتى. تىيىم سالىنعان پاتەرلەردىڭ ودان ءارى تاعدىرىن سوت انىقتايدى.
ساتىپ الۋشىلار ءوز قۇقىقتارىن ازاماتتىق تارتىپتە قورعاۋعا ءماجبۇر بولاتىنىنان قاۋىپتەنەدى. ولاردىڭ كوپشىلىگى ساتىپ العان باسپاناسى جالعىز جىلجىمايتىن م ۇلىك ەكەنىن ايتادى.