استانادا ءبىر تۇندە پوليسيا 171 كامەلەتكە تولماعان بۇزۋشىنى انىقتادى، ونىڭ ىشىندە 108 وقۋشى جانە 63 كوللەدج ستۋدەنتى بار. بارلىعى پوليسيا ورگاندارىنا جەتكىزىلدى، كىنالىلەر جاۋاپكەرشىلىككە تارتىلدى، ال رەيد وتكەن تۇنگى مەكەمەنىڭ قىزمەتى توقتاتىلدى، دەپ حابارلايدى infohub.kz سايتى.
قازاقستاننىڭ باس پروكۋراتۋراسى بالالار قۇقىعىن قورعاۋ ءۇشىن سيفرلىق قۇرالداردى بەلسەندى دامىتۋدا. باس پروكۋرور بەرىك اسىلوۆتىڭ تاپسىرماسى بويىنشا بۇكىل ەلدە «سانالى ۇرپاق» جوباسى جۇزەگە اسىرىلۋدا، ونىڭ اياسىندا كامەلەتكە تولماعانداردىڭ سيفرلىق پروفيلاكتيكالىق كارتاسى جاسالدى. بۇل قۇرال تاۋەكەل توبىنداعى بالالاردى الدىن الا انىقتاۋعا جانە قۇقىق بۇزۋشىلىق جاسالعانعا دەيىن قاجەتتى شارالار قابىلداۋعا مۇمكىندىك بەرەدى. قاداعالاۋ ورگانىندا زاماناۋي سيفرلىق تەحنولوگيالار پروفيلاكتيكانى بالالار قۇقىعىن قورعاۋدا نەعۇرلىم ۋاقتىلى ءارى ءتيىمدى ەتەتىنىن اتاپ ءوتتى.
العاش رەت جۇيە استاناداعى ءۇش كوللەدجدە سىناقتان ءوتتى. تالداۋ جاسوسپىرىمدەر قىلمىسىنىڭ نەگىزگى سەبەپتەرىن انىقتاۋعا مۇمكىندىك بەردى، ونىڭ ىشىندە ءبىلىم كوشى-قونى، پروفيلاكتيكالىق ەسەپكە ۋاقتىلى قويىلماۋى جانە اتا-انا باقىلاۋىنىڭ ءتيىستى دەڭگەيدە بولماۋى. تەك ءۇش وقۋ ورنىندا تىركەۋسىز تۇرعان جانە ءىس جۇزىندە مەملەكەتتىك ورگانداردىڭ نازارىنان تىس قالعان 45 ستۋدەنت انىقتالدى.
ءىس-شارا بارىسىندا جالپى ەل بويىنشا جاسوسپىرىمدەر قىلمىسىنىڭ 5%-عا (1 110-نان 1 061 جاعدايعا دەيىن) تومەندەگەنى اتاپ ءوتىلدى. جىل باسىنان بەرى 6 مىڭنان استام پروفيلاكتيكالىق رەيد وتكىزىلدى، 2 مىڭعا جۋىق كامەلەتكە تولماعان پروفيلاكتيكالىق ەسەپكە قويىلدى، ارقايسىسىمەن جەكە جۇمىس جۇرگىزىلۋدە.
«سونىمەن قاتار جاسوسپىرىمدەر ورتاسىنا تەرىس اسەر ەتەتىن فاكتورلار ساقتالۋدا. ولاردىڭ قاتارىندا – ينتەرنەتتى باقىلاۋسىز پايدالانۋ، اتا-انا تاراپىنان جەتكىلىكسىز نازار، ءبىلىم كوشى-قونى، سونداي-اق تاۋەكەل توبىنا ىلىككەن جاسوسپىرىمدەردى ۋاقتىلى انىقتاماۋ»، – دەپ قوستى قاداعالاۋ ورگانىندا.
كامەلەتكە تولماعاندار اراسىنداعى ءسۋيسيدتىڭ الدىن الۋ ماسەلەلەرىنە ەرەكشە نازار اۋدارىلدى، ونىڭ نەگىزگى سەبەپتەرى كوبىنەسە بۋللينگ، زورلىق-زومبىلىق جانە پسيحولوگيالىق قولايسىزدىق بولىپ وتىر.