«استانا» باسكەتبول كلۋبىنىڭ اينالاسىنداعى جاعدايعا قازاقستان تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى رەسمي تۇسىنىكتەمە بەردى، دەپ حابارلايدى infohub.kz سايتى.
ۆەدومستۆونىڭ ايتۋىنشا، سوڭعى جىلدارى كلۋبتىڭ حالىقارالىق ارەناداعى ونەرى قويىلعان مىندەتتەر مەن كۇتكەن ناتيجەگە سايكەس كەلمەگەن. وتكەن ماۋسىمدا ءبىرىڭعاي ۆتب ليگاسىندا «استانا» سوڭعى، 12-ورىندى يەلەنىپ، 44 ويىننىڭ تەك ەكەۋىندە جەڭىسكە جەتكەن. جەڭىلىس پايىزى 95%-دان اسىپ، بۇل كلۋبتىڭ ليگاداعى بۇكىل تاريحىنداعى ەڭ ناشار كورسەتكىش بولدى. سونىمەن قاتار، كوماندا سەگىز جىل بويى وسى ءتۋرنيردىڭ پلەي-وفف كەزەڭىنە شىعا المادى.
ىشكى ارەنادا دا «استانا» باسكەتبول كلۋبى العا قويعان ماقساتتارعا جەتە المادى: قازاقستان كۋبوگى ءۇشىن كۇرەستە جەڭىلىپ، ۇلتتىق ليگادا چەمپيوندىق اتاققا قول جەتكىزە المادى.
«وتكەن جىلى سپورتتى قارجىلاندىرۋ تيىمدىلىگىن ارتتىرۋدى كوزدەيتىن زاڭ قابىلداندى. ونىڭ نەگىزگى ەرەجەلەرى ۇلتتىق قۇراما كوماندالاردى باسىم دامىتۋعا، سپورتتىق رەزەرۆ قالىپتاستىرۋعا، سونداي-اق بيۋدجەت قاراجاتى ەسەبىنەن لەگيونەرلەردى قارجىلاندىرۋعا تىيىم سالۋعا باعىتتالعان. قالىپتاسقان جاعدايدا وتاندىق باسكەتبولدى دامىتۋ تاسىلدەرىن قايتا قاراۋ مۇمكىندىگى قاراستىرىلۋدا. باسىمدىق جاستار كومانداسىن دامىتۋعا، سپورتتىق رەزەرۆ دايىنداۋعا جانە بالالار مەن جاسوسپىرىمدەر سپورتىن قولداۋعا بەرىلەدى»، — دەپ اتاپ ءوتتى ۇيىمدا.
بۇعان دەيىن ەلوردالىق كوماندا مەن قازاقستان ۇلتتىق قۇراماسىنىڭ ويىنشىلارى ەل پرەزيدەنتى قاسىم-جومارت توقايەۆ پەن سپورت مينيسترىنە بەينەۇندەۋ جازعان بولاتىن. سپورتشىلار نەگىزگى قۇرامنىڭ تاراتىلۋى ولاردى جۇمىستان ايىرىپ، كوپشىلىگىن كاسىبي مانسابىن اياقتاۋعا ماجبۇرلەيتىنىن اتاپ ءوتتى. ويىنشىلار كلۋبقا كەم دەگەندە قازاقستان چەمپيوناتىنا قاتىسۋ ءۇشىن قارجىلاندىرۋدى ساقتاۋدى سۇرادى.
«بىزگە كاسىبي دەڭگەيدە ونەر كورسەتۋگە مۇمكىندىك بەرە الاتىن باسقا كوماندالاردىڭ بولماۋىنا بايلانىستى، مانسابىمىزدى جالعاستىراتىن جەرىمىز جوق. بۇل شەشىمنىڭ قابىلدانۋى 12 كاسىبي باسكەتبولشىنىڭ مانسابىن اياقتاۋعا ماجبۇرلەيدى، ال قازاقستان ۇلتتىق قۇراماسى كوپ جىلدار بويى حالىقارالىق ارەنادا ەلىمىزدىڭ نامىسىن قورعاپ كەلە جاتقان ويىنشىلاردان ايىرىلادى. ەگەر «استانا» پبك قازاقستان چەمپيوناتىنا قاتىسۋدى ساقتاپ قالسا، بىزدە ەلىمىزدە باسكەتبولدى دامىتۋ، ءوز كلۋبتارىمىز بەن ۇلتتىق قۇرامانىڭ نامىسىن قورعاۋ مۇمكىندىگى قالادى. «استانانىڭ» نەگىزگى كومانداسىنىڭ جويىلۋى بۇكىل قازاقستاندىق باسكەتبولعا اۋىر سوققى بولادى. بۇل جاس ويىنشىلاردىڭ دامۋىنا ءقاۋىپ توندىرەدى، ۇلتتىق چەمپيوناتتى السىرەتەدى، ۇلتتىق قۇراماعا ويىنشىلار دايىنداۋ جۇيەسىن بۇزادى جانە سپورت ءتۇرىمىزدىڭ بولاشاعىنا ۇلكەن زيان كەلتىرەدى. سونداي-اق، ءبىز بارلىق جانكۇيەرلەرىمىزگە وسى قيىن جاعدايدا ءبىزدى قولداپ، قوعام نازارىن وسى ماسەلەگە اۋدارۋعا كومەكتەسۋ وتىنىشىمەن جۇگىنەمىز. سىزدەردىڭ قولداۋلارىڭىز بۇگىن ەرەكشە ماڭىزدى»، — دەلىنگەن ويىنشىلاردىڭ ۇندەۋىندە.