استانادا سوت BMW جۇرگىزۋشىسىن 15 تاۋلىككە قامادى. ول ءۇش اي ىشىندە جول قوزعالىسى ەرەجەلەرىن 87 رەت بۇزعان، ونىڭ ىشىندە بىرنەشە رەت جىلدامدىقتى اسىرعان، دەپ حابارلايدى infohub.kz سايتى.
29 جاستاعى BMW كولىگىنىڭ جۇرگىزۋشىسى «ءقاۋىپسىز جول» جەدەل-پروفيلاكتيكالىق ءىس-شاراسى بارىسىندا اكىمشىلىك جاۋاپكەرشىلىككە تارتىلدى. استانا پوليسيا دەپارتامەنتىنىڭ مالىمەتىنشە، ول بيىلعى ناۋرىزدان ماۋسىمعا دەيىن 87 اكىمشىلىك قۇقىق بۇزۋشىلىق جاساعان.
ونىڭ 55 جاعدايىندا كامەرالار بەلگىلەنگەن جىلدامدىقتىڭ اسىرىلعانىن تىركەسە، 32 رەت كولىك مارشرۋتتىق كولىكتەرگە ارنالعان جولاقپەن جۇرگەن. پوليسيا مىسالدار كەلتىردى: ناۋرىزدا تۇران داڭعىلى مەن اقمەشىت كوشەسىندە كولىك جىلدامدىعى 129-131 كم/ساع جەتكەن. ماۋسىمدا ع.مۇستافين كوشەسىندە جىلدامدىق 126 كم/ساع، ال ك.مۇحامەدحانوۆ كوشەسىندە رۇقسات ەتىلگەن 60 كم/ساع كەزىندە 151 كم/ساع بولعان.
«جۇيەلى تۇردە قۇقىق بۇزۋشىلىق جاساپ، قوعامعا اشىق تۇردە قۇرمەتسىزدىك تانىتقانى ءۇشىن پوليسيا قىزمەتكەرلەرى بۇزۋشىنى ۇساق بۇزاقىلىق فاكتىسى بويىنشا اكىمشىلىك جاۋاپكەرشىلىككە تارتتى»، — دەپ قوستى پوليسيا دەپارتامەنتى. سوت شەشىمىمەن ەر ادام 15 تاۋلىككە قامالدى.
پوليسيا جول قوزعالىسى ەرەجەلەرىن جۇيەلى تۇردە بۇزۋ، اگرەسسيۆتى جۇرگىزۋ ءستيلى جانە باسقا جول قوزعالىسىنا قاتىسۋشىلارعا ءقاۋىپ ءتوندىرۋ جازاسىز قالمايتىنىن ەسكەرتتى.