قازاقستان استاناسى «ددۇ يننوۆاسيالىق قالا — 2026» حالىقارالىق سىيلىعىنىڭ 15 ءفيناليسىنىڭ قاتارىنا كىردى. بۇل تۋرالى قازاقستاننىڭ ادىلەت مينيسترلىگى دۇنيەجۇزىلىك زياتكەرلىك مەنشىك ۇيىمىنا سىلتەمە جاساپ حابارلادى، دەپ جازادى infohub.kz سايتى.
يننوۆاسيالىق جانە كرەاتيۆتى ەكوجۇيە دامىتىپ جاتقان قالالارعا ارنالعان بۇل سىيلىق العاش رەت بەرىلىپ وتىر. حالىقارالىق تاۋەلسىز قازىلار القاسى قالالار ۇسىنعان باستامالاردى، سونداي-اق ولاردى كەلەسى جىلى جۇزەگە اسىرۋ جوسپارلارىن باعالادى.
استانانىڭ وتىنىمىندە جاساندى ينتەللەكت پەن دەرەكتەردى تالداۋدى قولدانا وتىرىپ، Smart City پلاتفورماسىن دامىتۋ، جەكە باعىتتالعان مەملەكەتتىك قىزمەتتەر كورسەتەتىن ءبىرىڭعاي سيفرلىق پورتال قۇرۋ، قالانىڭ يننوۆاسيالىق ەكوجۇيەسىن نىعايتۋ، سونداي-اق قالالىق ورتانىڭ تۇراقتىلىعى مەن قولجەتىمدىلىگىن ارتتىرۋ ءۇشىن تەحنولوگيالاردى پايدالانۋ قاراستىرىلعان.
وتىنىمدەر الەمنىڭ تۇكپىر-تۇكپىرىنەن ءتۇرلى اۋقىمداعى قالالاردان ءتۇستى. استانامەن بىرگە فينالعا بەلگيا، جۇڭگو، ءۇندىستان، يوردانيا، ماروككو، فيليپپين، پورتۋگاليا، رەسەي، تايلاند جانە ۇلىبريتانيا قالالارى ءوتتى.
سىيلىقتىڭ ءۇش جەڭىمپازى 2026 جىلعى 12 قازاندا جەنەۆاداعى ددۇ شتاب-پاتەرىندە جاريالانادى. سالتانات بۇۇ مەرلەر فورۋمىنىڭ التىنشى كەزدەسۋى اياسىندا وتەدى.
بۇعان دەيىن «كۋرسيۆ» جازعانداي، استانا Global Cities Index 2026 رەيتينگىندە الەمنىڭ 1 مىڭ ءىرى قالاسىنىڭ ىشىندە 281-ورىنعا تۇراقتاپ، ءبىر جىلدا بەس ساتىعا تومەندەگەن. سونىمەن قاتار استانا ادامي كاپيتال دەڭگەيى بويىنشا 98-ورىندا، ەكونوميكالىق كورسەتكىشتەر بويىنشا 264-ورىندا تۇر.