استانادا Mercedes-Benz كولىگىن ايداعان جۇرگىزۋشى قالا جولىندا ءقاۋىپتى مانەۆرلەر جاساعانى ءۇشىن اكىمشىلىك قاماۋعا الىندى. بۇل شەشىمدى اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوت شىعاردى، دەپ حابارلايدى infohub.kz سايتى.
استانا سوتتارىنىڭ Telegram-ارناسىندا ءمالىم ەتكەندەي، قۇقىق بۇزۋشىلىق 30 قىركۇيەكتە انىقتالعان. Mercedes-Benz جۇرگىزۋشىسى جۇمابايەۆ كوشەسىمەن قيىلىستا دريفت جاساعان: كولىكتىڭ ارتقى بولىگىن ادەيى سىرعىتا وتىرىپ، ءقاۋىپتى مانەۆرلەردى كورسەتىپ ورىنداعان.
بۇگىن استانانىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى بۇل ءىستى اكىمشىلىك قۇقىق بۇزۋشىلىق تۋرالى كودەكستىڭ 434-بابىنىڭ 1-بولىگى بويىنشا قارادى. اتالعان باپتىڭ سانكسياسى 20-دان 60 ساعاتقا دەيىنگى قوعامدىق جۇمىستاردى نە 5-تەن 10 تاۋلىككە دەيىنگى اكىمشىلىك قاماۋدى كوزدەيدى. سوت وتىرىسىندا ايىپتالۋشى كىناسىن تولىق مويىندادى.
«جازا تاعايىنداۋ كەزىندە سوت جاسالعان قۇقىق بۇزۋشىلىقتىڭ سيپاتى مەن قوعامدىق قاۋىپتىلىك دارەجەسىن، ونىڭ ادەيى، جاريا جانە كورسەتىپ جاسالعان سيپاتىن ەسكەردى. قۇقىققا قايشى مىنەز-ق ۇلىق جول ءجۇرىسى قاعيدالارىنىڭ تالاپتارىن ورەسكەل بۇزۋمەن قاتار ءجۇرىپ، جول قوزعالىسىنا قاتىسۋشىلاردىڭ قاۋىپسىزدىگىنە قاتەر ءتوندىردى. ءمان-جايلاردىڭ جيىنتىعىن ەسكەرە وتىرىپ، سوت 10 تاۋلىككە اكىمشىلىك قاماۋ تۇرىندەگى اكىمشىلىك جازا تاعايىنداۋ قاجەت دەگەن قورىتىندىعا كەلدى»، — دەلىنگەن حابارلامادا.
قاۋلى زاڭدى كۇشىنە ەنگەن جوق.