استاناداعى №8 «دۋمان» مەملەكەتتىك بالاباقشاسىنا قاتىستى جانجال رەسمي ءتۇيىن الدى: استانا ءبىلىم باسقارماسى تەكسەرۋ قورىتىندىسىن جاريالادى. تەكسەرۋ «ءولى جاندار» مەن قاراجاتتى جىمقىرۋ دەرەكتەرىن راستامادى، ءبىراق قىزمەتكەرلەردىڭ دەربەس دەرەكتەرىنە بوگدە ادامنىڭ قول جەتكىزۋىنە دەيىنگى ءبىرقاتار باسقا دا زاڭبۇزۋشىلىقتاردى انىقتادى. بۇل تۋرالى infohub.kz سايتى حابارلايدى.
تەكسەرۋگە مەكتەپكە دەيىنگى مەكەمە قىزمەتكەرى اراي قۇسايىنوۆانىڭ الەۋمەتتىك جەلىلەردە تاراعان بەينەوتىنىشى سەبەپ بولدى. ايەل بالاباقشا قۇجاتتارىندا «ءولى جاندار» مەن قاراجاتتى جىمقىرۋدىڭ ىقتيمال دەرەكتەرىن تاپقانىن، ال ءبىلىم باسقارماسىنا شاعىمدانعاننان كەيىن ونى كەنەتتەن جۇمىستان شىعارىپ جىبەرگەنىن مالىمدەدى.
ۆەدومستۆونىڭ دەرەگىنشە، مەكەمە پەداگوگتەرى لاۋازىمدىق مىندەتتەرىنە كىرمەيتىن جۇمىستارعا تارتىلعان. سونىمەن قاتار تەكسەرۋ بالاباقشاداعى قاۋىپسىزدىك تالاپتارىنىڭ بۇزىلعانىن انىقتادى.
«اتاپ ايتقاندا، مەكەمە اۋماعىنا رۇقساتسىز جانە باقىلاۋسىز بوگدە ادام كىرگەن. انىقتالعانداي، ول بۇرىن مەڭگەرۋشىمەن نەكەدە بولعان. الايدا ول بالاباقشادا جۇمىس ىستەمەگەن جانە ۇيىم قۇجاتتارىنا قول جەتكىزۋگە مۇمكىندىك بەرەتىن شارت جاساماعان. سوعان قاراماستان ول قىزمەتكەرلەردىڭ دەربەس دەرەكتەرىنە قول جەتكىزگەن»، — دەدى ءبىلىم باسقارماسىندا.
ۆەدومستۆودا بۇزۋشىلىقتاردى ادىسكەر مەن كۇزەت قىزمەتكەرىنىڭ تۇسىنىكتەمەلەرى راستاعانىن، سونداي-اق بەينەباقىلاۋ كامەرالارىنىڭ جازبالارى قارالعانىن حابارلادى.
«تەكسەرۋ قورىتىندىسى بويىنشا قىزمەتكەرلەردىڭ دەربەس دەرەكتەرىن ءتيىستى رۇقساتسىز بوگدە ادامعا بەرۋ، تاراتۋ جانە وعان قول جەتكىزۋىن قامتاماسىز ەتۋ فاكتىلەرى انىقتالدى»، — دەلىنگەن ءبىلىم باسقارماسىنىڭ حابارلاماسىندا.
ناتيجەسىندە مەڭگەرۋشىمەن ەڭبەك شارتى بۇزىلدى. ۆەدومستۆو جۇمىستان شىعارۋدىڭ ءۇش سەبەبىن اتادى: قازاقستان رەسپۋبليكاسى زاڭناماسىنىڭ — «پەداگوگ مارتەبەسى تۋرالى» زاڭنىڭ، ەڭبەك كودەكسىنىڭ، «دەربەس دەرەكتەر جانە ولاردى قورعاۋ تۋرالى» زاڭنىڭ، سونداي-اق مەكتەپكە دەيىنگى ۇيىمداردىڭ تەرروريزمگە قارسى قورعانىس ەرەجەلەرىنىڭ تالاپتارىن بۇزۋ.
سونىمەن قاتار ءبىلىم باسقارماسىنىڭ تەكسەرۋى «ءولى جاندار» نەمەسە قاراجاتتى جىمقىرۋ تۋرالى اقپاراتتى راستامادى.
بۇعان دەيىن «كۋرسيۆ» استاناداعى جەكەمەنشىك بالاباقشا تاربيەشىسىن قىزدى ۇردى دەپ ايىپتاعانى تۋرالى جازعان بولاتىن.