قازاقستان استاناسىندا ەكىنشى اۋەجاي پايدا بولادى: ونى سينگاپۋردىڭ مەملەكەتتىك كومپانياسى تۇرعىزادى. قۇرىلىس 2027 جىلى باستالادى، ءتيىستى رامالىق كەلىسىمگە قول قويىلدى، دەپ حابارلايدى infohub.kz سايتى.
كولىك مينيسترلىگىنىڭ مالىمەتىنشە، قۇجات Changi Airport Group ەنشىلەس قۇرىلىمى — Changi Airports International (CAI) كومپانياسىمەن جاسالدى. كەلىسىم استانانىڭ اۋەجاي ينفراقۇرىلىمىن دامىتۋعا قاتىستى.
«تاراپتار استانا قالاسىندا جاڭا اۋەجاي سالۋ جوباسىن ىسكە اسىرۋ بويىنشا ىنتىماقتاستىق تۋرالى ۋاعدالاستى. جوبا قازاقستان رەسپۋبليكاسى پرەزيدەنتى قاسىم-جومارت توقاەۆتىڭ حالىقارالىق اۆياسيالىق حاب قالىپتاستىرۋ جانە استانانىڭ ترانزيتتىك الەۋەتىن دامىتۋ جونىندەگى تاپسىرماسىن ورىنداۋ اياسىندا جۇزەگە اسىرىلۋدا»، — دەلىنگەن ۆەدومستۆو حابارلاماسىندا.
جاڭا نىساننان بولەك، تاراپتار Changi Airports International كومپانياسىمەن قولدانىستاعى استانا حالىقارالىق اۋەجايى بويىنشا ءوزارا ءىس-قيمىل جاساسۋعا كەلىستى. اڭگىمە كومپانيانىڭ مەنەدجمەنتكە، وپەراسيالىق قىزمەتكە (O&M) جانە اۋەجايدى ودان ءارى دامىتۋدىڭ وزگە دە باعىتتارىنا قاتىسۋى تۋرالى بولىپ وتىر.
Changi Airport Group (CAG) — سينگاپۋردىڭ مەملەكەتتىك كومپانياسى، ول ەلدىڭ اۋەجاي ينفراقۇرىلىمىن، سونىڭ ىشىندە Changi حالىقارالىق اۋەجايىن باسقارۋعا جانە دامىتۋعا جاۋاپتى. بۇل اۋەجاي الەمنىڭ جەتەكشى حالىقارالىق اۆياسيالىق حابتارىنىڭ قاتارىنا كىرەدى. 2025 جىلى ول شامامەن 70 ملن جولاۋشى مەن 2 ملن توننادان استام جۇكتى قابىلداپ، سينگاپۋردى الەمنىڭ 170-تەن استام قالاسىمەن بايلانىستىردى. سونىمەن قاتار Changi Skytrax World Airport Awards نۇسقاسى بويىنشا 14 رەت «الەمنىڭ ۇزدىك اۋەجايى» اتاعىن جەڭىپ الدى، ونىڭ ىشىندە 2025 جانە 2026 جىلدارى دا.
ەسكە سالايىق، وتكەن جازدا قاسىم-جومارت توقايەۆ استانادا ەكىنشى اۋەجايدىڭ جاقىن ارادا سالىناتىنىن جاريالاعان بولاتىن.