Елордалық емханаларда, жедел жәрдем станцияларында және инфекциялық орталықтарда ЖРВИ мен тұмау өршуіне дайындықты тексеретін оқу-жаттығулар өтті. Дәрігерлер ауыр респираторлық инфекциясы бар науқастар көптеп келгенде қалай әрекет ету керектігін пысықтады, деп хабарлайды infohub.kz сайты.
Бесінші емханада ЖРВИ-мен ауырғандар жаппай келген жағдай модельденді. Мұнда медиктер науқастарды алғашқы қабылдау мен сұрыптауды, сондай-ақ ағындарды бөлуді, тексеру жүргізуді, медициналық ақпараттық жүйеге (МАЖ) деректерді енгізуді және тұмау мен COVID-19-ға талдау алуды пысықтады.
Сондай-ақ оқу-жаттығу легендасы бойынша жедел жәрдем инфекциялық ауруханаға ауыр халдегі науқастарды жаппай жеткізді. Фельдшерлер нақты өмірдегідей әрекет етуге жаттықты: адамның жағдайын ауруханаға жетпей тұрып-ақ жылдам бағалау, көлікте алғашқы көмек көрсету және науқас туралы барлық деректерді қабылдау бөліміндегі дәрігерлерге жедел жеткізу.
Науқастар жаппай келгенде медициналық сұрыптауға да (сценарий бойынша 2 сағатта 30-ға жуық қазақстандық келді), сондай-ақ төсек-орынның болуы мен қосымша инфекциялық төсектерді жайғастыруға дайындықты ескере отырып, адамдарды ауруханаларға бөлуге де көңіл бөлінді.
Сонымен қатар медиктер біртұтас механизм ретінде жұмыс істеуге жаттықты: жедел жәрдем, емханалар, ауруханалар мен зертханалар бір-бірін жарты сөзден түсінуі керек. Дәрігерлердің өз қауіпсіздігі де назардан тыс қалмады. Мұнда олардың қорғаныш костюмдері мен маскаларды қалай пайдаланатыны қатаң тексерілді.
Енді ұйымдастырушыларға «ұшу қорытындысын талдау» керек. Олар барлық қателіктерді саралап, әлсіз тұстарын пысықтайды. Мұның бәрі бір мақсат үшін жасалып жатыр: қыста адамдар жаппай ауыра бастағанда жүйе іркіліс бермей, әр науқас көмекті уақытында алуы үшін.
Бұған дейін «Курсив» Қазақстанда бірнеше адамның H1N1 штаммымен ауырғанын жазған.