قازاقستان استاناسىندا ەسىل وزەنى ارقىلى قالانىڭ سول جانە وڭ جاعالاۋىن جالعايتىن جاڭا سەگىز جولاقتى كوپىر سالۋ جوسپارلانىپ وتىر. جوبا حۋسەين بەن تالال كوشەسىن ءال-فارابي داڭعىلىنان ش. قالداياقوۆ كوشەسىنە دەيىن جالعاستىرۋ رەتىندە ويلاستىرىلعان، دەپ حابارلايدى infohub.kz سايتى.
استانا اكىمدىگىنىڭ كولىك جانە جول-كولىك ينفراقۇرىلىمىن دامىتۋ باسقارماسىنىڭ مالىمەتىنشە، قالانى دامىتۋدىڭ باس جوسپارىندا حۋسەين بەن تالال كوشەسىن ءال-فارابي داڭعىلىنان ش. قالداياقوۆ كوشەسىنە دەيىن جالعاستىرۋ قاراستىرىلعان. «حۋسەين بەن تالال كوشەسىنىڭ ەسىل وزەنىمەن قيىلىساتىن جەرىندە اۆتوكولىك كوپىرى سالىنادى»، — دەلىنگەن باسقارما حابارلاماسىندا.
جاڭا ماگيسترال استانانىڭ سول جانە وڭ جاعالاۋى اراسىندا قوسىمشا ترانزيتتىك كولىك ءدالىزىن قۇرىپ، كولىك اعىنىن ەڭ كوپ جۇكتەمە تۇسەتىن قالالىق ماگيسترالداردان قايتا بولۋگە ءتيىس. اتاپ ايتقاندا، سىعاناق كوشەسى مەن ۇلى دالا داڭعىلى تۋرالى ايتىلىپ وتىر.
«نۇرلى جول» جاڭا ۆوكزالىنا نەمەسە الماتى اۋدانىنا باعىت العان جۇرگىزۋشىلەر حۋسەين بەن تالال كوشەسىنىڭ جالعاسىن پايدالانا الادى. سونىمەن قاتار، اعىننىڭ ءبىر بولىگى وڭ جاعالاۋدىڭ باستى ماگيسترالدارىنىڭ ءبىرى — ماڭگىلىك ەل داڭعىلىن اينالىپ وتەدى. سىعاناق كوشەسىندەگى ەسىل وزەنى ارقىلى وتەتىن «ارىس» كوپىرى مەن تاۋەلسىزدىك داڭعىلىنداعى ەسىل وزەنى ارقىلى وتەتىن كوپىر دە ازايادى. اعىنداردى قايتا ءبولۋ قاربالاس ۋاقىتتا كوپىرلەرگە كىرەبەرىستەر مەن شىعابەرىستەردەگى جۇكتەمەنى ازايتادى.
جوبالاۋ شەشىمدەرىنە سايكەس حۋسەين بەن تالال كوشەسى جالپىقالالىق ماڭىزى بار ماگيسترالدىق كوشەلەرگە جاتادى جانە سەگىز جولاقتى بولادى.
«قازىرگى تاڭدا ينۆەستور ەسىل وزەنى ارقىلى كوپىر سالۋ جوباسىن ازىرلەۋدە. كوپىر قۇرىلىسىنىڭ قۇنى جوبالاۋ اياقتالىپ، مەملەكەتتىك ساراپتاما قورىتىندىسى الىنعاننان كەيىن ايقىندالادى»، — دەپ اتاپ ءوتتى ۆەدومستۆو.
ينۆەستور ازىرلەگەن جوبانى قالا بالانسىنا تاپسىرعاننان كەيىن كولىك باسقارماسى نىساندى مەملەكەتتىك قاراجات ەسەبىنەن ودان ءارى ىسكە اسىرۋ ماسەلەسىن قاراستىرادى. مەردىگەر ۇيىمدى مەملەكەتتىك ساتىپ الۋ اياسىندا ايقىنداۋ جوسپارلانۋدا.
الايدا ازىرگە كوپىردىڭ قۇرىلىسى مەن پايدالانۋعا بەرىلۋىنىڭ ناقتى مەرزىمى جوق.