استانادا گاشيش مايىن زاڭسىز اينالىمعا ءتۇسىردى دەگەن كۇدىكپەن ەكى ەر ادام ۇستالدى. ءتىنتۋ كەزىندە 1،5 كەلىدەن استام ەسىرتكى تاركىلەنىپ، نەگىزگى دالەل رەتىندە قاراپايىم مانتوۆاركا الىندى. ونى زاتتى بالقىتۋ ءۇشىن پايدالانعان، دەپ حابارلايدى infohub.kz.
پوليسيا مالىمەتىنشە، 24 جانە 23 جاستاعى ەلوردا تۇرعىندارى ءبىر كىرەبەرىستەگى ەكى ءتۇرلى قاباتتاعى پاتەردى جالداعان. تەرگەۋ نۇسقاسى بويىنشا، ولار بىرلەسىپ ارەكەت ەتىپ، ينتەرنەت-مەسسەندجەرلەر ارقىلى ەسىرتكى تاراتىپ، جاسىرىن ورىندار ۇيىمداستىرعان.
«ءتىنتۋ كەزىندە ەكى پاتەردەن دە سارى ءتۇستى سۇيىق كونسيستەنسيالى گاشيش مايى، ەلەكتروندى تارازى، وراۋ ماتەريالدارى جانە ەسىرتكى سالىنعان ىدىستار تابىلدى»، — دەلىنگەن پوليسيا حابارلاماسىندا.
سونىمەن قاتار، پاتەرلەردىڭ ءبىرىنىڭ اس ۇيىنەن ەسىرتكى قالدىقتارى جابىسقان مانتوۆاركا الىندى. تەرگەۋ دەرەگىنشە، كۇدىكتىلەر گاشيش مايىن بولشەكتەپ، ودان ءارى تاراتۋ ءۇشىن وسى قۇرىلعىدا بالقىتقان. بارلىعى پوليسيا 1،5 كەلىدەن استام گاشيش مايى مەن ماريحۋانانى تاركىلەدى.
«وسى فاكتى بويىنشا قىلمىستىق ءىس قوزعالدى. كۇدىكتىلەر ۇستالىپ، ۋاقىتشا ۇستاۋ يزولياتورىنا قامالدى»، — دەپ قوستى پوليسيادا. ۆەدومستۆو ەسىرتكى ساقتاۋ مەن تاراتۋدىڭ قىلمىستىق جاۋاپكەرشىلىگىن ەسكەرتىپ، تۇرعىنداردى وسىنداي دەرەكتەردى حابارلاۋعا شاقىردى.