4 қарашада Астана әкімдігі ғимаратының жанына жиналған 30-ға жуық жекеменшік қосымша білім беру ұйымының иесі балаларды Face ID арқылы міндетті сәйкестендіруге қарсылықтарын білдірді. Мәдениет және ақпарат министрлігі мемлекеттен субсидия алатын бұл азаматтардың әрекетін ашық дөрекілік деп бағалады, деп хабарлайды infohub.kz сайты.
2025 жылдан бастап Астанада балаларға қосымша білім беру бойынша бірыңғай мемлекеттік тапсырысты орналастырудың пилоттық жобасы жүзеге асырылуда. QOSYMSHA.KZ бағдарламасы аясында балалар үйірмелерге, шығармашылық студияларға және спорт секцияларына мемлекеттік қаржыландыру есебінен бара алады. Сонымен қатар балалар үйірмелері мен спорт секцияларында Face ID бетті тану жүйесі енгізілуде.
Жаңа технология жалған қатысуды жоюға, бюджет қаражатының жұмсалуын ашық етуге және қосымша білім беруді қаржыландырудың тиімділігін арттыруға бағытталған. Осылайша, Face ID енгізу «өлі жандарды» тіркеу мүмкіндігін толық жауып отыр.
Бағдарламаның маңызды шарттарының бірі — сабаққа нақты қатысқанын растау. Ол үшін электрондық есепке алу тетіктері, оның ішінде QR-кодтар мен Face ID бетті тану технологиясы қарастырылған.
Астананың білім басқармасы бұл жерде ең алдымен мемлекеттік қаражаттың ашық жұмсалуы туралы айтылып отырғанын түсіндірді. Жүйе баланың бюджеттен ақы төленетін сабаққа шынымен барғанын анықтауға мүмкіндік береді. Электрондық есепке алу қаржыландыру үдерісін ашық етіп, бюджет қаражатының мақсатты жұмсалуын бақылауды қамтамасыз етуге тиіс.
Кәмелетке толмағандардың дербес деректерін қорғау мәселесіне ерекше көңіл бөлінеді. Білім басқармасының мәлімдеуінше, дербес және биометриялық деректерді жинау мен өңдеу Қазақстан Республикасының «Дербес деректер және оларды қорғау туралы» заңының талаптарына сәйкес жүргізіледі.
Сонымен қатар қолданылып жатқан жүйе 2025 жылы мемлекеттік техникалық реттеу жүйесі аясында «Инфосерт» ЖШС-нің аккредиттелген сынақ орталығында сынақтан өтті. Оның нәтижелері бойынша тиісті сынақ хаттамалары мен белгіленген талаптарға сәйкестігін растайтын құжаттар ресімделді.
Қазіргі таңда жүйе Астанадағы екі жекеменшік қосымша білім беру ұйымында пилоттық режимде жұмыс істеп тұр. Бұл ретте жабдық тегін берілді. Оны сатып алуға қалалық бюджеттен қаражат бөлінген жоқ.
Білім басқармасы атап өткендей, пилоттық жоба жүзеге асырылған уақытта ата-аналар мен балалар тарапынан шағым түскен жоқ, ал қатысуды растайтын электрондық тетіктерді енгізу нормативтік құжаттарда қарастырылған.
Атап айтқанда, тиісті ережелер 2025 жылғы 28–30 мамырда уәкілетті мемлекеттік органдардың бірлескен бұйрықтарымен бекітілген Балаларға қосымша білім беру бойынша бірыңғай мемлекеттік тапсырысты орналастырудың пилоттық жобасын өткізу алгоритмінде бекітілген.
Білім басқармасы өкілдерінің айтуынша, олар қызмет көрсетушілермен бірнеше рет түсіндіру жұмыстарын жүргізген. Оларға жүйені енгізудің мақсаттары, оны қолданудың құқықтық негіздері және балалардың қатысуын растау тәртібі түсіндірілген.
Оның үстіне қосымша білім беру ұйымдарының өкілдері үшін арнайы оқыту ұйымдастырылды. Мұндай электрондық бақылау тетіктері тек Астанада ғана емес, Қазақстанның басқа да өңірлерінде, оның ішінде Атырау, Қарағанды, Қызылорда және Ақтөбе облыстарында қолданылады.
Қазақстанда, атап өтілгендей, оғаш көрініс қалыптасқан: жекеменшік білім беру ұйымдарының иелері мемлекеттік субсидия алады, алайда мемлекет тәртіп орнатып, ашықтықты қамтамасыз етуге тырысқанда, бұл әдетте әкімдіктердің жанындағы осындай «жиындарға» әкеп соғады.