قازاقستان استاناسىندا جەراستى وتكەلدەرىنىڭ قابىرعالارىن سۋرەتتەگەن كامەلەتكە تولماعاندار انىقتالىپ، ولاردىڭ اتا-انالارى اكىمشىلىك جاۋاپكەرشىلىككە تارتىلدى. بۇل تۋرالى استانا اكىمدىگىنە سىلتەمە جاساپ NUR.KZ حابارلادى، دەپ جازادى infohub.kz.
قالالىق بيلىكتىڭ تۇسىندىرۋىنشە، تەكسەرۋگە الەۋمەتتىك جەلىلەردە جەراستى وتكەلدەرىنىڭ قابىرعالارىندا ادەپسىز سيپاتتاعى ءتۇرلى جازۋلار مەن سۋرەتتەر پايدا بولعانى تۋرالى اقپاراتتىڭ تارالۋى سەبەپ بولعان.
وسىعان بايلانىستى بايقوڭىر اۋدانىنىڭ اۋماعىندا ءتيىستى جۇمىستار جۇرگىزىلىپ، ناتيجەسىندە وسى ارەكەتتەردى جاساعان جاسوسپىرىمدەر انىقتالدى — ولار پوليسيا بولىمىنە جەتكىزىلدى.
اتالعان فاكتىلەر بويىنشا جاسوسپىرىمدەردىڭ اتا-انالارىنا قاتىستى «ۇساق بۇزاقىلىق» بابى بويىنشا اكىمشىلىك شارالار قولدانىلعانى اتاپ ءوتىلدى.
بايقوڭىر اۋدانىنىڭ اكىمدىگى جەرگىلىكتى تۇرعىنداردى قوعامدىق ورىندارعا ۇقىپتى قاراۋعا، تازالىقتى ساقتاۋعا جانە ورتاق م ۇلىكتى قۇرمەتتەۋگە شاقىردى.
بىرنەشە كۇن بۇرىن ءبىز قازاقستان پرەزيدەنتى قاسىم-جومارت توقاەۆتىڭ استانا اكىمى جەڭىس قاسىمبەككە قوعامدىق عيماراتتاردىڭ قابىرعالارىن گراففيتيمەن سۋرەتتەۋگە تىرىسقان ادامدارعا قاتىستى قاتاڭ شارالار قولدانۋدى تاپسىرعانىن جازعان بولاتىنبىز.
قازاقستان پرەزيدەنتى قاسىم-جومارت توقاەۆتىڭ تاپسىرماسىنان كەيىن ىشكى ىستەر مينيسترلىگىنىڭ باسشىسى ەرجان سادەنوۆ قازاقستاندا قوعامدىق عيماراتتارعا گراففيتي سالۋعا تولىق تىيىم سالۋدى ۇسىندى.