قازاقستان استاناسىندا تەندەرلىك جوبالارعا ينۆەستيسيا سالۋ اتىن جامىلىپ، بىرنەشە رەت الاياقتىق جاسادى دەگەن كۇدىككە ىلىنگەن 32 جاستاعى ەر ادام ۇستالدى. ونىڭ ىس-ارەكەتىنەن كەلتىرىلگەن شىعىن شامامەن 35 ميلليون تەڭگەنى قۇرايدى، 11 ادام زارداپ شەكتى، دەپ حابارلايدى infohub.kz سايتى.
تەرگەۋ دەرەكتەرى بويىنشا، كۇدىكتى TikTok جانە Threads الەۋمەتتىك جەلىلەرىندە جوعارى تابىستى ينۆەستيسيالار تۋرالى حابارلاندىرۋلار ورنالاستىرعان. قىزىعۋشىلىق تانىتقان پايدالانۋشىلارعا ول بەينەقوڭىراۋلار كەزىندە اقشا سالۋدى ۇسىنىپ، رەسمي ىنتىماقتاستىق پەن تەز پايدا تابۋدى ۋادە ەتكەن.
سەنىمدىلىك ءۇشىن كۇدىكتى كليەنتتەرمەن نوتاريالدى كۋالاندىرىلعان كەلىسىمشارتتار جاساسقان. الايدا، ءىرى سومالاردى العان سوڭ، ول ءوز مىندەتتەمەلەرىن ورىنداماي، اقشانى ءوز قالاۋىنشا جۇمساعان.
قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالعان. پوليسيا سوتقا دەيىنگى تەرگەۋ جۇرگىزىپ، ونىڭ باسقا دا وسىعان ۇقساس قىلمىستارعا قاتىسى بار-جوعىن تەكسەرەدى.
ۆەدومستۆو ازاماتتاردى ساق بولۋعا شاقىردى: ينۆەستيسيالىق جوبالار تۋرالى اقپاراتتى تەكسەرۋگە، كەپىلدىك بەرىلگەن جوعارى تابىس ۋادەلەرىنە سەنبەۋگە جانە بەيتانىس ادامدارعا اقشا اۋدارماۋعا كەڭەس بەردى.
بۇعان دەيىن الاياقتار جالعان ينۆەستيسيالىق پلاتفورمالاردى پايدالانىپ، الدىمەن شاعىن سومانى الۋعا رۇقسات بەرەتىنى حابارلانعان بولاتىن. وسىدان كەيىن جابىرلەنۋشىنى سالىمدى ۇلعايتۋعا كوندىرەدى، ال ۇلكەن سومانى الۋعا تىرىسقاندا سالىق، كوميسسيا نەمەسە ساقتاندىرۋ تولەۋدى تالاپ ەتەدى. ۇلتتىق بانكتە رەتتەۋشى قىزمەتكەرلەرى ازاماتتارعا ينۆەستيسيالىق ونىمدەردى ۇسىنبايتىنىن جانە حالىقپەن ەسەپ ايىرىسۋ جۇرگىزبەيتىنىن ەسكە سالدى.