استانادا تەگىن JOLTAP كۋرستارىن بىتىرگەندەردىڭ 60%-ى جۇمىسقا ورنالاستى. بۇل تۋرالى ەلوردا اكىمى جەڭىس قاسىمبەك Instagram-دا مالىمدەدى، دەپ حابارلايدى infohub.kz سايتى.
«ءۇش جىل بۇرىن ءبىز ازاماتتارعا جاڭا كاسىپتى تەگىن مەڭگەرۋگە، ءوز ءىسىن اشۋعا، جۇمىس تابۋعا جانە مەملەكەتتىك قولداۋ شارالارى بويىنشا كەڭەس الۋعا مۇمكىندىك بەرەتىن JOLTAP جوباسىن باستاعان ەدىك»، — دەپ جازدى قاسىمبەك.
ءۇش جىل ىشىندە تىگىن ءىسى، دانەكەرلەۋ، SMM جانە باسقا دا باعىتتار بويىنشا 22 مىڭ ادام وقىدى. تاعى 17% تۇلەك فريلانسپەن اينالىسادى، ال 2 مىڭعا جۋىق ادام شاعىن كاسىپ اشتى.
جوبا ءۇشىن 30 باعدارلاما ازىرلەندى. ونىڭ 19-ى جۇمىسشى ماماندىقتارىنا ارنالعان: تىگىنشى، ناۋبايشى، ەلەكترگازدانەكەرلەۋشى، اياق كيىم جوندەۋشى جانە جيھاز جيناۋشى ماماندىقتارى بار. تاعى 11 باعىت سيفرلىق داعدىلارعا — SMM، تارگەتتەلگەن جارناما، گرافيكالىق ديزاين جانە موبيلوگرافياعا ارنالعان.
«سيفرلىق كۋرستاردىڭ ماڭىزدى ەرەكشەلىگى — جاساندى ينتەللەكت قۇرالدارىنىڭ ەنگىزىلۋى»، — دەپ اتاپ ءوتتى قاسىمبەك.
وقۋ تەگىن. جازىلۋعا «بارشاعا مۇمكىندىك» ءموبيلدى پۋنكتتەرىندە، اۋداندىق اكىمدىكتەردە جانە استانانىڭ جۇمىسپەن قامتۋ باسقارماسىنىڭ مانساپ ورتالىقتارىندا بولادى.
پرەزيدەنتتىڭ تاپسىرماسى بويىنشا جوبا ەندى ەلىمىزدىڭ بارلىق وڭىرىنە تاراتىلادى.
بۇعان دەيىن ەڭبەك مينيسترلىگى ەلدەگى ەڭ سۇرانىسقا يە ماماندىقتاردى اتاعان بولاتىن. ۆەدومستۆو دەرەگىنشە، قازاقستانداعى بوس ورىنداردىڭ 42%-عا جۋىعى بىلىكتى جۇمىسشى ماماندىقتارىنا، قىزمەت كورسەتۋ سالاسىنا جانە اۋىل شارۋاشىلىعىنا تيەسىلى.