استانادا بەينەباقىلاۋ جۇيەسى حالىقارالىق ىزدەۋدە جۇرگەن 24 جاستاعى ەر ادامدى تانىدى. پوليسيا قىزمەتكەرلەرى الىنعان دەرەكتەردى تەكسەرىپ، ونى ۇستادى، دەپ حابارلايدى infohub.kz سايتى.
ىشكى ىستەر مينيسترلىگىنىڭ ۆەدومستۆولىق سايتىندا حابارلانعانداي، سيفرلىق بەينەباقىلاۋ جۇيەسى قۇقىق قورعاۋشىلارعا ىزدەۋدەگى ادامدى تابۋعا كومەكتەستى. تەحنولوگيا بەت-الپەتتى تانۋ جانە ازاماتتاردى ىزدەۋ ءۇشىن قولدانىلادى.
«جۇيە سۋرەتتەردى اقپاراتتىق بازالارداعى دەرەكتەرمەن اۆتوماتتى تۇردە سالىستىرادى. ىزدەۋ تەك فوتوسۋرەت بويىنشا عانا ەمەس، سىرتقى بەلگىلەرى — جىنىسى، جاسى، ساقالى، كوزىلدىرىگى، ماسكاسى نەمەسە باس كيىمى بويىنشا دا جۇرگىزىلەدى. سونىمەن قاتار، تەحنولوگيا تانىلعان ادامنىڭ قوزعالىس باعىتىن بەينەباقىلاۋ كامەرالارى ارقىلى باقىلاۋعا مۇمكىندىك بەرەدى»، — دەلىنگەن حابارلامادا.
سيفرلىق شەشىمنىڭ تيىمدىلىگى ناقتى ناتيجەلەرمەن راستالادى. «ماسەلەن، بەينەباقىلاۋ بارىسىندا جۇيە ۇرلىق جاسادى دەگەن كۇدىكپەن حالىقارالىق ىزدەۋدە جۇرگەن 24 جاستاعى ەر ادامدى تانىدى. اقپاراتتى پوليسيا قىزمەتكەرلەرى تەكسەرگەننەن كەيىن ەر ادام ۇستالدى. پوليسيا زاماناۋي بەينەباقىلاۋ جۇيەلەرىن ەنگىزۋ قوعامدىق قاۋىپسىزدىكتى نىعايتۋعا، ىزدەۋدەگى ادامداردى ۋاقتىلى انىقتاۋعا جانە قۇقىق قورعاۋ ورگاندارىنىڭ جۇمىسىنىڭ تيىمدىلىگىن ارتتىرۋعا باعىتتالعانىن اتاپ وتەدى»، — دەپ قوستى پوليسيا.