قوستانايدا جاۋاپكەرلەر جول-كولىك وقيعاسىندا زارداپ شەككەن كامەلەتكە تولماعانعا مورالدىق زيان ءۇشىن 5 ميلليون تەڭگە تولەۋگە ەرىكتى تۇردە كەلىستى، دەپ حابارلايدى infohub.kz سايتى.
قوستاناي وبلىسى سوتتارىنىڭ رەسمي Telegram-ارناسىندا حابارلانعانداي، قوستاناي قالالىق سوتى ايەلدىڭ كامەلەتكە تولماعان بالاسىنىڭ مۇددەسىنە ەكى جاۋاپكەرشىلىگى شەكتەۋلى سەرىكتەستىككە قارسى زالالدى وتەۋ جانە مورالدىق زياندى وتەۋ تۋرالى تالاپ ارىزى بويىنشا ازاماتتىق ءىستى قارادى.
ءىس ماتەريالدارىنا سايكەس، 2026 جىلدىڭ مامىر ايىندا استانا – قاراعاندى تاس جولىندا جۇك جانە جەڭىل كولىكتەردىڭ قاتىسۋىمەن جول-كولىك وقيعاسى بولعان. سالدارىنان جەڭىل كولىكتە بولعان كامەلەتكە تولماعان بالانىڭ دەنساۋلىعىنا اۋىر زيان كەلتىرىلگەن.
العان جاراقاتتارىنا بايلانىستى ول ستاسيونارلىق ەمنەن ءوتىپ، نەيروحيرۋرگيالىق وپەراسيا جاساتقان.
جكو-عا بايلانىستى تالاپكەر مورالدىق زياندى وتەۋ، سونداي-اق زاڭگەرلىك قىزمەتتەرگە اقى تولەۋ شىعىندارىن ءوندىرىپ الۋ تۋرالى تالاپتار قويعان.
سوت وتىرىسى بارىسىندا تاراپتار داۋدى مەدياسيا تارتىبىمەن رەتتەۋ تۋرالى كەلىسىمگە كەلدى. كەلىسىم شارتتارىنا سايكەس، جاۋاپكەرلەر زارداپ شەككەنگە مورالدىق زيان ءۇشىن 5 ميلليون تەڭگە جانە زاڭگەرلىك قىزمەتتەردى تولەۋ ءۇشىن 300 مىڭ تەڭگە تولەۋگە مىندەتتەندى.
سوت مەدياتيۆتىك كەلىسىمنىڭ مازمۇنىن تەكسەرىپ، ونىڭ زاڭناما تالاپتارىنا سايكەستىگىن انىقتاپ، ونى بەكىتۋگە بولادى دەگەن قورىتىندىعا كەلدى. داۋدى مەدياسيا تارتىبىمەن رەتتەۋ تۋرالى كەلىسىم سوتپەن بەكىتىلىپ، ازاماتتىق ءىس بويىنشا ءىس جۇرگىزۋ توقتاتىلدى.
مەدياتيۆتىك كەلىسىمنىڭ شارتتارى سوت ونى بەكىتكەن ساتتەن باستاپ كۇشىنە ەنەدى جانە تاراپتاردىڭ ورىنداۋى ءۇشىن مىندەتتى بولىپ تابىلادى.