استاناداعى تۇرعىن ءۇيدىڭ كارىزىنەن نارەستە تابىلدى. بۇل جەرگىلىكتى تۇرعىنداردى تاڭ قالدىردى. انىقتالعانداي، ءۇيدىڭ جانىنداعى قوناق ۇيگە كەلگەن ءبىر ايەل بولمەدە بوسانعان سوڭ، نارەستەنى ورتاق كارىزگە تاستاعان، دەپ حابارلايدى infohub.kz سايتى.
«وسى جەرگە كەلگەن ءبىر ايەل بولمەدەگى دارەتحانادا بوساندى دا، بالانى كارىزگە يتەرىپ جىبەردى (كارىز بىزدە ورتاق). كىشكەنتاي 6 ايلىق ءتىرى قىز بالا»، — دەپ جازدى tatarovna_ اتتى قولدانۋشى Threads الەۋمەتتىك جەلىسىندە.
ايەلدىڭ ايتۋىنشا، تۇنگى ساعات ۇشتە ونى كورشىسى وياتقان. كورشىسى كارىزدەن بالا تابىلعانىن ايتىپ، ۇيدەن شىعىپ، قىلمىستىق ىزدەستىرۋ قىزمەتكەرلەرىنە كومەكتەسۋدى وتىنگەن. «كەلگەن قىزمەتكەرلەر بىردەن سۇرادى، تۇرعىنداردىڭ اراسىندا كىمنىڭ ىستەگەنىنە كۇدىگىمىز بار ما؟ ءبىز ەشكىمگە كۇدىك جوق، بۇل 100% قوناق ءۇي كەلۋشىلەرى دەپ جاۋاپ بەردىك»، — دەپ قوستى جازبا اۆتورى.
تۇرعىننىڭ ايتۋىنشا، قوناق ءۇي تۇرعىن ۇيگە تىم جاقىن، قۇرىلىس نورمالارى بۇزىلا سالىنعان. ءار ءتۇنى اشىق تەرەزەلەردەن قاتتى ايعاي مەن شۋ شىعادى، ونى ەرەسەكتەر عانا ەمەس، بالالار دا ەستيدى. اۋدان تۇرعىندارى بىرنەشە جىل بويى شاعىمدانىپ كەلەدى، ءبىراق جاعداي وزگەرمەيدى.
استانا قالالىق پوليسيا دەپارتامەنتىنىڭ مالىمەتىنشە، كارىزدە نارەستەنىڭ تابىلۋىنا بايلانىستى «الماتى» اۋداندىق پوليسيا باسقارماسى سوتقا دەيىنگى تەرگەۋدى باستادى. قىلمىستىق ءىس اياسىندا تەرگەۋ-جەدەل شارالار جۇرگىزىلىپ، سوت ساراپتامالارى تاعايىندالدى. وسى قىلمىستىق قۇقىق بۇزۋشىلىققا قاتىسى بار ادام انىقتالدى.