استانادا تۇرعىن ۇيلەردىڭ قاسبەتتەرىنە كونديسيونەرلەردى ورنالاستىرۋ ەرەجەلەرىن وزگەرتۋ جوسپارلانۋدا. جاڭا تالاپتار قالانىڭ جاڭارتىلعان ديزاين-كودىنا ەنگىزىلەدى، دەپ حابارلايدى infohub.kz.
استانا قالالىق ساۋلەت جانە قالا قۇرىلىسى باسقارماسىنىڭ مالىمەتىنشە، ەرەجەلەر تۇرعىن ءۇي سىنىبىنا جانە عيماراتتاردىڭ ساۋلەتتىك ەرەكشەلىكتەرىنە قاراي بەلگىلەنەتىن بولادى. ۇيلەردىڭ ءار ءتۇرلى ساناتى ءۇشىن جەكە تالاپتار قاراستىرىلادى. باسقارما باسشىسى التىنبەك احمەتوۆ: «بۇل قۇجاتتا كونديسيونەرلەردى قالاي جانە قانداي تاسىلمەن ورناتۋ كەرەكتىگى ناقتى سيپاتتالعان»، — دەدى.
ۋربانيستيكا ورتالىعىنىڭ وكىلى دانيار چينداليەۆتىڭ ايتۋىنشا، ءبىرىنشى جانە ەكىنشى سىنىپتاعى تۇرعىن ۇيلەردە سىرتقى بلوكتاردى قاسبەت ساۋلەتىنە ساي كەلەتىن ارنايى ساندىك سەبەتتەرگە ورنالاستىرۋ جوسپارلانۋدا. «مۇنداي كونسترۋكسيالار ءتۇسى مەن بەزەندىرىلۋى جاعىنان عيماراتتىڭ جالپى كەلبەتىنە بەيىمدەلۋى ءتيىس»، — دەپ ءتۇسىندىردى چيندالييەۆ.
ۇيلەردىڭ قالعان ساناتتارى ءۇشىن باسقا ءتاسىل ۇسىنىلادى: كونديسيونەرلەر عيماراتتىڭ ساۋلەتتىك شەشىمىنە الدىن الا ەنگىزىلىپ، كوشەدەن بايقالماۋى كەرەك. چينداليەۆ: «كونديسيونەرلەردى تىكەلەي عيمارات ساۋلەتىنە كىرىكتىرۋ كوزدەلگەن. ولار جاسىرىن بولۋى ءتيىس. كونديسيونەر قاسبەتتىڭ ارلەۋىنە ەمەس، عيماراتتىڭ تىرەۋىش كونسترۋكسياسىنا بەكىتىلۋى كەرەك»، — دەپ ناقتىلادى.
ءقازىردىڭ وزىندە سالىنىپ قويعان ۇيلەر ءۇشىن ورناتۋ ءتارتىبى ازىرگە بۇرىنعى قالپىندا قالادى. سىرتقى بلوكتاردى ورنالاستىرۋ تۋرالى شەشىم تۇرعىن ءۇي يەلەرىنىڭ جالپى جينالىسىندا قابىلدانادى. الايدا احمەتوۆتىڭ ايتۋىنشا، تۇرعىنداردىڭ كەلىسىمى بولسا دا، قۇرىلعى قاسبەتتىڭ سىرتقى كورىنىسىن بۇزباۋ ءۇشىن ارنايى ەلەمەنتتەرمەن جابىلۋى كەرەك.
ازىرگە جاڭا تالاپتاردىڭ ساقتالۋىن باقىلاۋ تەتىگى مەن جاۋاپكەرشىلىك شارالارى انىقتالماعان. اكىمدىكتىڭ حابارلاۋىنشا، ديزاين-كود بەكىتىلگەننەن كەيىن بۇل ماسەلەلەر جەكە قۇجاتپەن رەتتەلەتىن بولادى.