استانادا 31 تامىزدا بولعان توتەنشە جاعداي سالدارىنان اياعىنان ايىرىلعان مۇنارا كرانىنىڭ ءماشينيسى اقمارال قاراباليەۆا ءومىر بويى اليمەنت تولەۋدى تالاپ ەتىپ وتىر، دەپ حابارلايدى infohub.kz سايتى.
قايعىلى وقيعا 31 تامىزدا ورىن الدى: استانادا مۇنارا كرانى بولشەكتەۋ كەزىندە قۇلاپ كەتتى. سلەسار سول جەردە قازا تاپتى، ال ءماشينيستىڭ وڭ اياعى كەسىلدى.
ءۇش بالانى جالعىز ءوزى تاربيەلەپ وتىرعان اقمارال قاراباليەۆا وزىنە ءومىر بويى اليمەنت تاعايىنداۋدى تالاپ ەتەدى.
«ءبىز مۇنارا كرانىنىڭ ءبىر سەكسياسىن شەشتىك. سوسىن بىرەۋ راسيا ارقىلى: "ەكەۋلەپ الايىق، وندا نە بار!" – دەپ ايقايلادى. سلەسارلاردىڭ ءبىرى: "تاتە، ءقازىر ءبىزدى شايقايدى، قورىقپاڭىز"، – دەدى. كران سونشالىقتى شايقالدى، مەن ۇشىپ كەتتىم! سودان كەيىن وپەراسيا ۇستەلىندە جاتتىم. اۋىرسىنۋدى باساتىن دارىلەر كومەكتەسپەيدى. كەيدە سونداي اۋىر بولادى، ءتىپتى اللادان مەنى الىپ كەتۋىن سۇرايمىن»، – دەيدى ايەل.
كران ءماشينيسى جۇمىس بەرۋشىنىڭ وعان مۇگەدەكتەر ارباسىن ساتىپ اپەرگەنىن جانە ءۇش ايلىق جالاقى مولشەرىندە وتەماقى تولەۋگە ۋادە بەرگەنىن ايتادى. الايدا اقمارال قاراباليەۆا ەڭبەك قابىلەتىنەن ايىرىلعاندىقتان، ءومىر بويى اليمەنت تالاپ ەتەدى. ايەلدىڭ سوزىنشە، ول جاقىندا ءبولىپ تولەۋگە پاتەر ساتىپ العان. تۇرعىن ءۇي قارىزى 19 ملن تەڭگەدەن استام.
«كراننىڭ قۇلاۋىنىڭ تىكەلەي سەبەبىن انىقتاۋ ءۇشىن مامانداندىرىلعان ۇيىم تارتىلدى. بۇگىنگى تاڭدا قورىتىندى ءالى كەلىپ تۇسكەن جوق، جۇمىس ۇستىندە. قىزمەتكەر رەسمي تۇردە جۇمىسقا ورنالاسقان، ساقتاندىرۋ شارتى بار. تەرگەۋ ناتيجەلەرى بويىنشا ساقتاندىرۋ تولەمدەرىن الۋ ءۇشىن ساقتاندىرۋ كومپانياسىنا جىبەرىلەتىن اكت شىعارىلادى»، – دەيدى استانا قالاسى بويىنشا مەملەكەتتىك ەڭبەك ينسپەكسياسى كوميتەتى دەپارتامەنتى ءبولىمىنىڭ باسشىسى رۋستام جاندوسوۆ.
سونىمەن قاتار، مۇگەدەكتىك بەلگىلەنگەننەن كەيىن مەديسينالىق-الەۋمەتتىك ساراپتاما اقمارال قاراباليەۆانىڭ ەڭبەك قابىلەتىنەن ايىرىلۋ دەڭگەيىن انىقتايدى. جۇمىس بەرۋشىنىڭ وعان زەينەتكەرلىك جاسقا جەتكەنگە دەيىن اي سايىنعى جاردەماقىنى قانداي مولشەردە تولەيتىنى وسىعان بايلانىستى بولادى.
ەسكە سالايىق، بۇعان دەيىن استانادا تۇرعىن ءۇي كەشەنىنىڭ قۇرىلىسى كەزىندە قۇرىلىس كرانىنىڭ قۇلاعانى حابارلانعان بولاتىن. ءبىر ادام قازا تاپتى، قىلمىستىق ءىس قوزعالدى.