استانانىڭ 8،5 مىڭنان استام جاس تۇرعىنى وقۋ جىلىنىڭ باسىندا ريۋكزاكتار مەن قاجەتتى مەكتەپ كەرەك-جاراقتارىن تەگىن الادى، دەپ حابارلايدى infohub.kz.
ەلوردادا 1 تامىزدان باستاپ ءداستۇرلى رەسپۋبليكالىق «مەكتەپكە جول» قايىرىمدىلىق اكسياسى باستالدى. ونىڭ باستى ماقساتى — الەۋمەتتىك وسال وتباسىلارداعى بالالارعا جاڭا وقۋ جىلىنا دايىندالۋعا كومەكتەسۋ.
قالا اكىمدىگىنىڭ مالىمەتىنشە، دەمەۋشىلەر ەسەبىنەن از قامتىلعان جانە كوپبالالى وتباسىلاردىڭ بالالارىنا، جەتىم بالالارعا جانە اتا-اناسىنىڭ قامقورلىعىنسىز قالعان بالالارعا قايىرىمدىلىق كومەك كورسەتىلەدى. ولارعا مەكتەپ ريۋكزاكتارى مەن وقۋ قۇرالدارى تابىستالادى. ءقازىر ءبىلىم بەرۋ ۇيىمدارى مۇقتاج وقۋشىلاردىڭ تىزىمدەرىن ناقتىلاپ جاتىر.
سونىمەن قاتار، قولداۋ «جالپى ءبىلىم» قورى ارقىلى جۇزەگە اسىرىلادى. ماتەريالدىق كومەك جەتىم بالالارعا، اتا-اناسىنىڭ قامقورلىعىنسىز قالعان بالالارعا، از قامتىلعان وتباسىلاردىڭ وقۋشىلارىنا، اتاۋلى الەۋمەتتىك كومەك الاتىن وتباسىلارعا، سونداي-اق قيىن ومىرلىك جاعدايعا تاپ بولعان بالالارعا قاراستىرىلعان. اقشا قاراجاتى اتا-انالاردىڭ نەمەسە زاڭدى وكىلدەردىڭ شوتتارىنا اۋدارىلادى، وسىلايشا ولار مەكتەپ فورماسىن، اياق كيىم مەن كەڭسە تاۋارلارىن وزدەرى تاڭداپ، ساتىپ الا الادى.
بۇگىنگى تاڭدا ەلوردا مەكتەپتەرىنە ماتەريالدىق كومەك الۋعا 5 مىڭنان استام ءوتىنىش تۇسكەن.
بۇدان باسقا، 2-31 تامىز ارالىعىندا استانانىڭ بارلىق اۋداندارىندا مەكتەپ جارمەڭكەلەرى وتەدى، وندا تۇرعىندار قولجەتىمدى باعامەن مەكتەپ فورماسىن، اياق كيىم مەن كەڭسە تاۋارلارىن ساتىپ الا الادى. سونداي-اق قالادا «مەيىرىمدى قولدار» قايىرىمدىلىق اكسياسى وتەدى، ونىڭ اياسىندا اۋداندىق اكىمدىكتەر مەكتەپ كەرەك-جاراقتارى مەن وقۋ قۇرالدارىن جيناۋ ءۇشىن ارنايى كونتەينەرلەر ورناتادى.