قازاقستان استاناسىندا 1 قىركۇيەكتە جاڭا وقۋ جىلى باستالدى. استانا مەكتەپتەرىندە 1–11-سىنىپ وقۋشىلارىنا ارنالعان العاشقى سىنىپ ساعاتتارى «قازاقستان رەسپۋبليكاسىنىڭ كونستيتۋسياسى – ادال ازامات، زەردەلى ۇلت جانە جاۋاپتى قوعام قالىپتاستىرۋدىڭ نەگىزى» تاقىرىبىندا ءوتتى، دەپ حابارلايدى infohub.kz سايتى.
ءىس-شارالار «ادال ازامات» ءبىرىڭعاي تاربيە باعدارلاماسى اياسىندا ۇيىمداستىرىلدى. وقۋشىلارعا ق ر كونستيتۋسياسىنا ەنگىزىلگەن وزگەرىستەر مەن تولىقتىرۋلاردىڭ ءمانى ءتۇسىندىرىلىپ، قۇقىقتىق مادەنيەتتى قالىپتاستىرۋعا، ازاماتتىق جاۋاپكەرشىلىكتى ارتتىرۋعا جانە ۇلتتىق قۇندىلىقتاردى قۇرمەتتەۋگە ەرەكشە كوڭىل بولىنۋدە. «ادال ازامات»، «تازا قازاقستان»، «زاڭ جانە ءتارتىپ» جانە «تولىق ادام» قۇندىلىقتارىنا جەكە توقتالادى. وقۋشىلارمەن ءوز ىس-ارەكەتتەرى ءۇشىن جاۋاپكەرشىلىك، زاڭدى ساقتاۋ، باسقالاردى قۇرمەتتەۋ جانە قورشاعان ورتاعا ۇقىپتى قاراۋ ماسەلەلەرى تالقىلانادى.
جاڭا 2026–2027 وقۋ جىلىندا استانانىڭ 206 ورتا ءبىلىم بەرۋ ۇيىمىندا 337 مىڭنان استام بالا وقيدى. ونىڭ شامامەن 33 مىڭى بيىل مەكتەپ تابالدىرىعىن العاش رەت اتتادى. وقۋ جىلىنىڭ باسىنا قاراي استانانىڭ ءبىلىم مەكەمەلەرى كەشەندى دايىندىقتان ءوتتى. قاۋىپسىزدىك، ينتەرنەت بايلانىسىنىڭ ساپاسى، سانيتارلىق جاعداي جانە تاماقتاندىرۋدى ۇيىمداستىرۋ ماسەلەلەرىنە ەرەكشە نازار اۋدارىلدى. بارلىق مەملەكەتتىك مەكتەپتەر بەينەباقىلاۋ جۇيەلەرىمەن جابدىقتالعان، ال كامەرالار مەن دابىل تۇيمەلەرى ءبىرىڭعاي سيتۋاسيالىق ورتالىققا جانە پوليسيا دەپارتامەنتىنىڭ جەدەل باسقارۋ ورتالىعىنا قوسىلعان.
وقۋشىلاردى وقۋلىقتارمەن جانە وقۋ-ادىستەمەلىك كەشەندەرمەن قامتاماسىز ەتۋ ءۇشىن بيىل 14 باسپادان 1،2 ميلليوننان استام دانا ساتىپ الىندى. مەملەكەتتىك مەكتەپتەردىڭ باستاۋىش سىنىپتارى مەن الەۋمەتتىك وسال توپتاعى بالالار تەگىن ىستىق تاماقپەن تولىق قامتاماسىز ەتىلگەن.
سونىمەن قاتار، جاڭا وقۋ جىلى قارساڭىندا استانادا №13، №41، №72، №73، №79، №82 جانە №86 مەكتەپتەر جانىنان 7 قوسىمشا وقۋ عيماراتى جانە 2 جەكەمەنشىك مەكتەپ اشىلدى. جاڭا نىساندار قوسىمشا وقۋشى ورىندارىن قۇرۋعا جانە قولدانىستاعى مەكتەپتەرگە جۇكتەمەنى ازايتۋعا مۇمكىندىك بەرەدى.