استانادا تۇنگى ساعات 03:30-دا مونشادا قاتتى مۋزىكا قوسىپ، كاراوكە ايتقان 37 جاستاعى ايەلگە پوليسيا ايىپپۇل سالدى. ونىڭ شۋلى تارتىبىنە جەرگىلىكتى تۇرعىندار شاعىمدانعان، دەپ حابارلايدى infohub.kz سايتى.
NUR.KZء-تىڭ Polisia.kz-كە سىلتەمە جاساپ حابارلاۋىنشا، ىشكى ىستەر مينيسترلىگىنىڭ مەدياپورتالىنىڭ دەرەگىنشە، تۇنگى 03:30 شاماسىندا استاناداعى لەپسى كوشەسىندە ورنالاسقان مونشالاردىڭ بىرىندە تىنىشتىقتى بۇزۋ تۋرالى حابارلاما تۇسكەن.
پوليسيا قىزمەتكەرلەرى وقيعا ورنىنا كەلىپ، جاعدايدى انىقتادى. ءمالىم بولعانداي، عيماراتتا قاتتى مۋزىكا قوسىلىپ، شۋ مەن داۋىستار ەستىلگەن. سونىمەن قاتار كەلۋشىلەر كاراوكە ايتقان.
وسى فاكتى بويىنشا 37 جاستاعى ازاماتشاعا قاتىستى اكىمشىلىك قۇقىق بۇزۋشىلىق تۋرالى حاتتاما تولتىرىلدى.
«پوليسيا ازاماتتاردى تۇنگى ۋاقىتتا تىنىشتىق ساقتاۋعا، اينالاداعى تۇرعىنداردىڭ زاڭدى مۇددەلەرى مەن دەمالىس قۇقىعىن قۇرمەتتەۋگە شاقىرادى. ويىن-ساۋىق ورىندارىندا دەمالعان كەزدە دە بەلگىلەنگەن تالاپتاردى ساقتاۋ ماڭىزدى. قاتتى مۋزىكا، ايقاي، شۋ مەن كاراوكە جاقىن ماڭداعى ءۇي تۇرعىندارىنىڭ دەمالىسىنا كەدەرگى كەلتىرمەۋى ءتيىس»، — دەدى قالالىق پوليسيا دەپارتامەنتىندە.