استانادا ەكى كۇنگە سوزىلعان نوسەردەن 39 ميلليمەتر جاۋىن-شاشىن ءتۇستى (ايلىق نورمانىڭ 70%-ى دەرلىك). كوشەلەر، تۇرعىن ءۇي كەشەندەرىنىڭ جەرتولەلەرى مەن كىرەبەرىستەرى سۋ استىندا قالدى. قاتتى جەل اعاشتاردى قۇلاتىپ، دۋالداردى قيراتتى، ونداعان اۆتوكولىك سۋعا باتتى. زارداپ شەككەندەر قالا بيلىگىنەن شىعىندى وتەۋدى تالاپ ەتۋدە. بۇل تۋرالى infohub.kz سايتى حابارلايدى.
قالا اكىمدىگىنىڭ مالىمەتىنشە، نەبارى 22 مينۋتتىڭ ىشىندە 11،5 ميلليمەتر جاۋىن-شاشىن تۇسكەن. كەيبىر تۇرعىن ءۇي كەشەندەرىندە جەرتولەلەر، سوكولدىق قاباتتار مەن كىرەبەرىستەر سۋ استىندا قالدى. وسي ءتوراعاسى نۋرسۇلتان ايمدوسوۆتىڭ ايتۋىنشا، شاتىردان نوسەر سۋى لىقسىپ اعىپ، باسسەين اسەرىن تۋعىزىپ، جالعىز نوسەر قۇدىعى كوتەرە الماعان. «سۋ تىزەگە دەيىن كوتەرىلدى. مىنا تابالدىرىق وڭاي اتتالىپ، بارلىعى نپ-لارعا قۇيىلادى، سول نپ-لار ارقىلى ءبىزدىڭ پودۆالعا كەتەدى»، — دەدى ول.
ەلوردانىڭ باسقا دا تۇرعىن ءۇي كەشەندەرى سۋ استىندا قالدى. سۋدى سورعىزعانىمەن، نوسەردىڭ سالدارى ءالى دە بايقالادى: كەيبىر ۇيلەردە ليفت جۇمىس ىستەمەيدى، جەرتولەلەر ىلعال بولىپ تۇر.
ەڭ كوپ زارداپ شەككەندەر — اۆتوكولىك يەلەرى. سۋ باسقان كوشەلەردە ونداعان ماشينا تولىقتاي سۋ استىندا قالىپ، يەلەرى ۇستىڭگى جاعىنا شىعىپ قۇتىلعان. زاڭگەرلەردىڭ تۇسىندىرۋىنشە، ەگەر ساراپتاما نوسەر كارىزىنىڭ اقاۋىن نەمەسە ءتيىستى كۇتىمنىڭ جوقتىعىن راستاسا، وتەماقى تالاپ ەتۋگە بولادى. زارداپ شەككەندەردىڭ كوبى اكىمدىككە بەينەۇندەۋ جازىپ جاتىر.
زارداپ شەككەن روبەرت دوساەۆ: «مەن وسى اۋداننىڭ اكىمى مەن اۋداندىق اكىمدىكتىڭ شىعىندى وتەپ، كولىگىمدى قالپىنا كەلتىرۋىن تالاپ ەتەمىن. سەبەبى قوزعالتقىش جۇمىس ىستەمەيدى، ەلەكتروندى جۇيە ىستەن شىقتى — ماشينا مۇلدەم جارامسىز. سوندىقتان ءبىزدىڭ تالاپ — كولىكتى تولىق قالپىنا كەلتىرىپ، كەلتىرىلگەن شىعىندى وتەۋ. ءبىز تولىق وتەماقىنى تالاپ ەتەمىز»، — دەدى.
قۇتقارۋشىلار مەن كوممۋنالدىق قىزمەتتەر جەدەل جەتتى. ولار سۋدى سورعىزىپ، ادامداردى ەۆاكۋاسيالاپ، كولىكتەردى سۇيرەدى. استانا قالاسى توتەنشە جاعدايلار دەپارتامەنتى تج جويۋ باسقارماسىنىڭ باستىعى باۋىرجان احمەتاليننىڭ ايتۋىنشا: «استانا قالاسى اۋماعىندا مول جاۋىن-شاشىن سالدارىنان كوشەلەر مەن اۋماقتاردى سۋ باسۋ، اعاشتاردىڭ قۇلاۋى جانە ەلەكتر قۋاتىنىڭ ءوشۋى تىركەلدى. استانا قالاسى توتەنشە جاعدايلار دەپارتامەنتى كوممۋنالدىق قىزمەتتەرگە كومەك كورسەتتى، وعان 36 ادام، 12 بىرلىك تەحنيكا، سونداي-اق 8 موتوپومپا جۇمىلدىرىلدى. جۇمىستار جاۋىن سۋىن سورعىزۋ، تۇرعىنداردى ەۆاكۋاسيالاۋ، كولىكتەردى قۇتقارۋ جانە اعاشتاردى كەسۋ بويىنشا جۇرگىزىلدى»، — دەدى.
سينوپتيكتەردىڭ دەرەگىنشە، استانادا جاڭبىر 25، 28 جانە 29 شىلدەدە جالعاسادى، قارقىندىلىعى 14 ميلليمەترگە دەيىن جەتەدى. كەلەسى اپتادا تەمپەراتۋرا +32...+34 گرادۋسقا دەيىن كوتەرىلەدى. تجد قاتتى جاۋىن-شاشىن كەزىندە مۇمكىندىگىنشە سىرتقا شىقپاۋعا جانە جەكە كولىكپەن جۇرۋدەن باس تارتۋعا كەڭەس بەرەدى.