استاناداعى «نۇرلى جول» تەمىرجول ۆوكزالىندا كونديسيونەرلەردىڭ جۇمىس ىستەمەۋىنە بايلانىستى جولاۋشىلار شاعىمدانعاننان كەيىن، «قازاقستان تەمىر جولى» كومپانياسى كونديسيونەرلەۋ جانە جەلدەتۋ جۇيەلەرىندەگى اقاۋلىقتاردى مويىندادى. بۇل تۋرالى infohub.kz سايتى حابارلايدى.
Threads الەۋمەتتىك جەلىسىنىڭ ءبىر قولدانۋشىسى اشۋلى حابارلاما جاريالاپ، وندا: «استانا، «نۇرلى جول» ۆوكزالى، باسشىلىققا ۇيات. كونديسيونەرلەر كوپ بولعانىمەن، ۆوكزالدا اپتاپ ىستىق»، – دەپ جازدى. كەيبىر جولاۋشىلار كونديسيونەرلەردىڭ مۇلدە جوقتىعىن ايتتى.
قتج ءباسپاسوز قىزمەتى: «„نۇرلى جول" تەمىرجول ۆوكزال كەشەنىنىڭ عيماراتىندا كونديسيونەرلەۋ جانە جەلدەتۋ جۇيەلەرىنىڭ جۇمىسىندا اقاۋلار انىقتالدى، بۇل بولمەلەردەگى تەمپەراتۋرانىڭ كوتەرىلۋىنە اكەلدى. قازىرگى ۋاقىتتا جابدىقتى ۋاقتىلى تەحنيكالىق قىزمەت كورسەتپەگەن مەردىگەر ۇيىمعا قاتىستى تالاپ-شاعىم جۇمىستارى جۇرگىزىلۋدە»، – دەپ مالىمدەدى. كومپانيادا قوسىمشا قولدانىستاعى كونديسيونەرلەۋ جانە جەلدەتۋ جۇيەلەرىنە كۇردەلى جوندەۋ جۇرگىزۋ ماسەلەسى دە قاراستىرىلىپ جاتقانىن ايتتى.
بۇدان بۇرىن استانا ۆوكزالى كارىز جۇيەسىندەگى اقاۋلارعا بايلانىستى سۋ باسقانى حابارلانعان ەدى.