استانادا Qyran تۇرعىن ءۇي كەشەنىندە بىردەي پاتەرلەردى بىرنەشە رەت ساتۋ بويىنشا قىلمىستىق ءىستى تەرگەۋ اياقتالدى. قۇرىلىس كومپانياسىنىڭ باسشىلىعى ەكى جىل بويى ءبىر نىسانداردى ءارتۇرلى ساتىپ الۋشىلارعا ساتىپ كەلگەن. جالپى شىعىن 4،5 ملرد تەڭگەدەن اسقانىن infohub.kz حابارلايدى.
ءىس بويىنشا 51 جەكە تۇلعا جانە ءبىر زاڭدى تۇلعا زارداپ شەگۋشى دەپ تانىلدى. ءتورت ايىپتالۋشى قاماۋدا، ماتەريالدار استانانىڭ قىلمىستىق ىستەر جونىندەگى اۋدانارالىق سوتىنا جىبەرىلدى.
زارداپ شەككەن وتباسىلاردىڭ ءبىرى 2024 جىلى پاتەر ساتىپ الدى. مامىلەدەن كەيىن تۇرعىن ءۇي eGov ارقىلى تىركەلدى، انىقتامادا ەشقانداي اۋىرتپالىق جوق كورسەتىلدى. ءبىراق 2025 جىلدىڭ كۇزىندە پاتەرگە تىيىم سالىندى.
«ەكى كۇننەن كەيىن eGov ارقىلى اۋىرتپالىقتىڭ جوقتىعى تۋرالى انىقتاما الدىق. پاتەر تازا بولىپ، ءبىزدىڭ اتىمىزعا تىركەلدى. كوشىپ كىرىپ، جاڭا ءۇي تويىن وتكىزدىك. ال 2025 جىلدىڭ كۇزىندە وعان تىيىم سالىنعانىن بىلدىك»، — دەدى استانا تۇرعىنى سامات ماليكوۆ.
ءدال وسىنداي ماسەلەگە تاپ بولعان باسقا ساتىپ الۋشىلار دا بار. استانا تۇرعىنى ايناگۇل باكىروۆا 2025 جىلدىڭ قاڭتارىندا بىردەن ءۇش پاتەر ساتىپ الىپ، اقشانى كومپانيا كەڭسەسىندە قولما-قول بەرگەنىن ايتتى. «اقشانى كومپانيا يەلەرى جەكە وزدەرى قابىلدادى. سومانى ساناپ، ءۇش كەپىل كەلىسىمى مەن ءۇش تولەم تاپسىرماسىن بەردى. سوسىن قۇرىلىسقا رۇقسات، پايدالانۋعا بەرۋ اكتىسىن كورسەتىپ، ءبارى زاڭدى، جوندەۋ جۇمىستارىن باستاۋعا بولادى دەپ سەندىردى»، — دەپ اڭگىمەلەدى باكىروۆا.
ەلوردالىق ەكونوميكالىق تەرگەۋ دەپارتامەنتىنىڭ دەرەگىنشە، بارلىق كەلىسىمدەر جاسالىپ، اقشا كومپانيا كەڭسەسىندە ايىپتالۋشىلاردىڭ قاتىسۋىمەن بەرىلگەن. تەرگەۋ العان قاراجات فيگۋرانتتاردىڭ شوتتارىنا تۇسكەن دەپ ەسەپتەيدى، ءبىراق بۋحگالتەرلىك جانە بانكتىك قۇجاتتاردا اقشانىڭ كىمگە تيەسىلى ەكەنى كورسەتىلمەگەن. قۇقىق قورعاۋ ورگاندارى وسىلايشا كومپانيا سالىق تولەۋدەن جالتارعان بولۋى مۇمكىن دەپ سانايدى.
فيگۋرانتتار سەنىپ تاپسىرىلعان م ۇلىكتى يەمدەنۋ نەمەسە جىمقىرۋ، اسا ءىرى مولشەردەگى الاياقتىق جانە ءوز بەتىنشە بيلىك ەتۋ بويىنشا ايىپتالۋدا. «سوتقا دەيىنگى تەرگەۋ اياقتالدى، ايىپتاۋ اكتىسى استانا پروكۋراتۋراسىمەن بەكىتىلدى. قىلمىستىق ءىس ءمانى بويىنشا قاراۋ ءۇشىن قىلمىستىق ىستەر جونىندەگى اۋدانارالىق سوتقا جىبەرىلدى»، — دەپ حابارلادى قۇقىق قورعاۋ ورگاندارى. ايىپتاۋ ۇكىمى شىققان جاعدايدا سوتتالۋشىلار بەس جىلدان 12 جىلعا دەيىن باس بوستاندىعىنان ايىرىلۋى مۇمكىن.
سوت سونداي-اق تىيىم سالىنعان پاتەرلەردىڭ بولاشاق تاعدىرىن انىقتايدى. ساتىپ الۋشىلار ازاماتتىق ءىس جۇرگىزۋ اياسىندا تۇرعىن ۇيگە قۇقىعىن جەكە دالەلدەۋگە ءماجبۇر بولادى دەپ قاۋىپتەنەدى. كوپتەگەن زارداپ شەگۋشىلەر ءۇشىن بۇل پاتەرلەر — ولاردىڭ جالعىز جىلجىمايتىن مۇلكى.