استانا پوليسياسى ەسىرتكىنى ساقتاۋ جانە ساتۋعا كۇدىكتى ەكى جاس ەر ادامنىڭ ارەكەتىن توقتاتتى. ولار گاشيش مايىن دايىنداۋ ءۇشىن ءبىر پودەزدەن ەكى پاتەر جالداپ، اس ۇيدە مانتى قازانىن پايدالانعان. ءتىنتۋ كەزىندە 1،5 كيلوگرامنان استام تىيىم سالىنعان زات الىندى، دەپ حابارلايدى infohub.kz.
پوليسيانىڭ انىقتاۋىنشا، 24 جانە 23 جاستاعى استانا تۇرعىندارى ءبىر پودەزدىڭ ءار قاباتىنان ەكى پاتەر جالداپ، ينتەرنەت-مەسسەندجەرلەر ارقىلى تاينيك-زاكلادكا ادىسىمەن گاشيش مايىن تاراتقان.
ءتىنتۋ كەزىندە ەكى پاتەردەن سارى ءتۇستى سۇيىقتىق تولتىرىلعان پلاستيك بوتەلكەلەر تابىلدى. ولاردىڭ قۇرامىندا گاشيش مايى بار ەكەنى انىقتالدى. سونداي-اق ەلەكتروندى تارازى، وراۋ ماتەريالدارى جانە ەسىرتكى سالۋعا ارنالعان ىدىستار تاركىلەندى.
پوليسيانىڭ نازارىن پاتەرلەردىڭ بىرىندەگى اس ءۇي ەرەكشە اۋداردى. وندا مانتى قازانىنىڭ بەتىندە ەسىرتكى قاباتى بايقالدى. تەرگەۋ بارىسىندا كۇدىكتىلەر بۇل قازاندى گاشيش مايىن ەرىتىپ، ونى وراۋعا جەڭىلدەتۋ ءۇشىن پايدالانعانى بەلگىلى بولدى.
بارلىعى 1،5 كيلوگرامنان استام گاشيش مايى مەن ماريحۋانا تاركىلەندى. كۇدىكتىلەر ۇستالىپ، ۋاقىتشا ۇستاۋ يزولياتورىنا جابىلدى. قىلمىستىق ءىس قوزعالدى.
پوليسيا ەسىرتكىنىڭ زاڭسىز ساقتالۋى، دايىندالۋى جانە ساتىلۋى قىلمىستىق جاۋاپكەرشىلىككە اكەلەتىنىن ەسكەرتەدى. قۇقىق قورعاۋ ورگاندارى ازاماتتاردى ەسىرتكى اينالىمىنا قاتىستى كەز كەلگەن دەرەكتى حابارلاۋعا شاقىرادى.