استانادا پوليسيا 29 جاستاعى ايەلدى ۇستادى. ول قوناقۇيلەردىڭ بىرىندە بوسانعان سوڭ، نارەستەنى كارىزگە تاستادى دەگەن كۇدىككە ءىلىندى. بۇل تۋرالى infohub.kz سايتى حابارلايدى.
بۇل وقيعا تۋرالى اقپارات الەۋمەتتىك جەلىلەردە تارادى. استانا پوليسيا دەپارتامەنتى فاكتىنى راستاپ، كۇدىكتىنىڭ ۇستالعانىن حابارلادى.
الەۋمەتتىك جەلىلەردەگى مالىمەتكە سايكەس، ايەل جۇكتىلىكتىڭ التىنشى ايىندا مەرزىمىنەن بۇرىن بوسانعان.
پوليسيانىڭ مالىمەتىنشە، نارەستەنىڭ كارىزدەن تابىلۋىنا بايلانىستى سوتقا دەيىنگى تەرگەۋ جۇرگىزىلۋدە.
ءقوناقۇيدىڭ جانىنداعى تۇرعىن ءۇي كەشەنىنىڭ تۇرعىندارى ءقوناقۇي ىشىنەن شىققان ۇرەيلى ايقايلارعا بىرنەشە رەت شاعىمدانعان. ولاردىڭ ايتۋىنشا، ءار ءتۇن سايىن پاترۋل شاقىرادى، الايدا پوليسيا ءتيىستى شارالاردى قولدانبايدى.
استانا پوليسيا دەپارتامەنتىنىڭ حابارلاۋىنشا، 2026 جىلدىڭ باسىنان بەرى وسى قوناقۇيدەن 102 ارناسىنا 19 حابارلاما تۇسكەن. «تۇنگى تىنىشتىقتى بۇزعانى ءۇشىن 13 ادام، قوعامدىق ءتارتىپتى بۇزعانى ءۇشىن 3 ادام اكىمشىلىك جاۋاپكەرشىلىككە تارتىلدى»، — دەپ مالىمدەدى پوليسەيلەر.
ءقوناقۇي يەسىنە قىلمىستىق قۇقىق بۇزۋشىلىقتارعا ىقپال ەتەتىن سەبەپتەر مەن جاعدايلاردى جويۋ تۋرالى ۇسىنىس بەرىلدى. «بۇل اۋماق ۋچاسكەلىك پوليسيا ينسپەكتورلارىنىڭ تۇراقتى باقىلاۋىندا»، — دەپ تۇيىندەدى دەپارتامەنتتەن.
بۇعان دەيىن اقتوبەدە قوقىس پاكەتىنەن ءتىرى نارەستە تابىلعانى حابارلانعان بولاتىن.