قازاقستان استاناسىندا ءبىر وتباسىنىڭ ءتورت مۇشەسى كامەلەتكە تولماعانداردى تارتقان پريتون ۇيىمداستىردى دەپ كۇدىكتەنۋدە. بۇل تۋرالى infohub.kz سايتى حابارلايدى.
باس پروكۋراتۋرانىڭ دەرەگىنشە، تەرگەۋ 15 ادامعا قاتىستى جۇرگىزىلگەن، ولاردىڭ اراسىندا ءبىر وتباسىنىڭ بىرنەشە وكىلى بار.
«تەرگەۋ بارىسىندا 2023–2025 جىلدارى ەكى ءاپالى-سىڭلىلى جۇبايلارىمەن بىرگە تۇرعىن ءۇي كەشەندەرىندە جىنىستىق قىزمەت كورسەتۋ ءۇشىن پريتون قۇرعانى انىقتالدى. قىلمىستىق توپ قۇرامىندا كۇزەتشىلەر، اكىمشىلەر، سونداي-اق الەۋمەتتىك جەلىلەر مەن مەسسەندجەرلەر ارقىلى قىزمەت جارنامالاعان ادامدار بولدى»، — دەلىنگەن حابارلامادا.
ۇيىمداستىرۋشىلار قالانىڭ تۇنگى كلۋبتارىنان قىزداردى ىزدەپ، ولارعا جوعارى تابىس، تۇرعىن ءۇي، قاۋىپسىزدىك جانە قۇپيالىلىق ۋادە ەتكەن بولۋى مۇمكىن.
«سونىمەن قاتار قىلمىسكەرلەر كليەنتتەردىڭ الكوگولدىك ماساڭ كۇيىن پايدالانىپ، ولارعا دەنە كۇشىن قولدانعان، اقشالارىن بوپسالاعان جانە جالدامالى پاتەرلەردە زاڭسىز ۇستاعان»، — دەپ قوستى باس پروكۋراتۋرادا.
15 قاتىسۋشىنىڭ بارلىعى ۇستالدى، ولارعا قاتىستى قاماۋدا ۇستاۋ جانە ءۇيقاماق تۇرىندەگى بۇلتارتپاۋ شاراسى تاڭدالدى.
استانا پروكۋراتۋراسى قىلمىستىق ءىستى سوتقا جىبەردى. ايىپتالۋشىنىڭ ارەكەتتەرىنە تۇپكىلىكتى قۇقىقتىق باعا سوت وتىرىسى بارىسىندا بەرىلەدى.