استاناداعى ۇيلەردىڭ ءبىرىنىڭ اۋلاسىندا سەيسەنبى كۇنى ايەل ادامعا پىشاقپەن شابۋىل جاسالىپ، ول العان جاراقاتىنان سول جەردە كوز جۇمدى. بۇل تۋرالى قالالىق پوليسيا دەپارتامەنتى حابارلادى، دەپ جازادى infohub.kz.
وقيعا تۋرالى اقپارات Shyndyk.kz Telegram-ارناسىندا جاريالاندى. ارنانىڭ دەرەگىنشە، 1996 جىلى تۋعان ايەلگە استانانىڭ ءبىر اۋلاسىندا پىشاقپەن شابۋىل جاسالعان. «الدىن الا مالىمەتتەرگە سۇيەنسەك، ايەل كولىگىن اۋلادا تۇراققا قويىپ جاتقاندا، وعان پىشاق ۇستاعان ەر ادام شابۋىل جاساعان. كۋاگەرلەر شابۋىلدان كەيىن ونىڭ قاشىپ كەتكەنىن ايتقان. كورشىلەردىڭ سوزىنشە، مارقۇم شابۋىلداۋشىمەن تانىس بولۋى مۇمكىن. بولجام بويىنشا، ول ايەلدىڭ بۇرىنعى كۇيەۋى. ايەلدىڭ ەكى بالاسى قالدى»، — دەلىنگەن جاريالانىمدا.
«استانا — چتو؟ گدە؟ كوگدا؟» Telegram-ارناسىنىڭ مالىمەتىنشە، ولتىرىلگەن ايەلدىڭ بۇرىنعى جۇبايى بولىپ تابىلاتىن ەر ادام ۇستالعان.
استانا پوليسيا دەپارتامەنتىنىڭ ءباسپاسوز قىزمەتى NUR.KZ تىلشىسىنە حابارلاعانداي، 23 قىركۇيەكتە ساعات 20:00 شاماسىندا پوليسياعا ايەلگە شابۋىل جاسالعانى تۋرالى حابارلاما تۇسكەن. «وقيعا ورنىنا دەرەۋ پوليسيا قىزمەتكەرلەرى كەلدى. ەر ادامنىڭ ايەلگە پىشاق جاراقاتىن سالعانى انىقتالدى»، — دەدى ۆەدومستۆودا.
العان جاراقاتىنان زارداپ شەككەن ايەل سول جەردە كوز جۇمدى. كۇدىكتى جەدەل ۇستالىپ، ۋاقىتشا ۇستاۋ يزولياتورىنا قامالدى. كىسى ءولتىرۋ فاكتىسى بويىنشا قىلمىستىق ءىس قوزعالىپ، تەرگەۋ شارالارىنىڭ كەشەنى جۇرگىزىلۋدە.
پوليسيا دەپارتامەنتىندە سونداي-اق بولجامدى قانىشەردىڭ قۇقىق قورعاۋ ورگانىنىڭ قىزمەتكەرى ەكەنى تۋرالى اقپارات جوققا شىعارىلدى. «كۇدىكتىنىڭ پوليسيا قىزمەتكەرى ەكەنى تۋرالى تاراعان اقپارات شىندىققا سايكەس كەلمەيتىنىن حابارلايمىز. تەرگەۋ بارىسى پوليسيا دەپارتامەنتى باسشىلىعىنىڭ ەرەكشە باقىلاۋىندا. كىنالى ادام زاڭنىڭ بارلىق قاتاڭدىعىمەن جاۋاپقا تارتىلادى»، — دەپ قوستى ۆەدومستۆودا.