استانادا 27 قىركۇيەكتە «استانا ارەنا» ستاديونىنىڭ ماڭىندا جول قوزعالىسى سحەماسى وزگەرەدى. مۇندا قايرات نۇرتاستىڭ كونسەرتى وتەدى، باستالۋى — 19:00-دە. بۇل تۋرالى infohub.kz سايتى حابارلايدى.
كولىك قوزعالىسى «الاۋ» مۇز ايدىنى جاعىنان ماركو پولو كوشەسىندە، سونداي-اق «سارىارقا» ۆەلوترەگى جاعىنان مەسروپ ماشتوس كوشەسىندە ۋاقىتشا شەكتەلەدى.
كونسەرت قوناقتارىنا قولايلىلىق جاساۋ جانە كولىك جۇكتەمەسىن ازايتۋ ءۇشىن ارنايى شاتتل-باستار ۇيىمداستىرىلادى. ولار ساعات 16:00-دەن باستاپ قالانىڭ ءتورت تۇراق ايماعىنان «استانا ارەنا» ستاديونىنا قاراي جۇرە باستايدى. مۇندا كولىكتى قالدىرىپ، ستاديونعا دەيىن شاتتل-باسپەن جالعاستىرۋعا بولادى.
«كونسەرت اياقتالعان سوڭ شاتتل-باستار كورەرمەندەردى سول تۇراق ايماقتارىنا قايتا جەتكىزەدى: استانا سيركىنىڭ جانىنداعى تۇراق، „حازرەت سۇلتان“ مەشىتىنىڭ جانىنداعى تۇراق، قاجىمۇقان كوشەسىندەگى „قازاقستان“ سپورت كەشەنىنىڭ جانىنداعى تۇراق، „نۇر-سۇلتان“ مەشىتىنىڭ (باس مەشىت) جانىنداعى تۇراق»، — دەلىنگەن حابارلامادا.
سونداي-اق كورەرمەندەر كونسەرت ورنىنا تەز ءارى قولايلى جەتۋگە مۇمكىندىك بەرەتىن «تارلان استانا» جەڭىل رەلستى كولىگىن پايدالانا الادى.
«مارشرۋتتى الدىن الا جوسپارلاپ، كەپتەلىستەر مەن ستاديون ماڭىنداعى تۇراق قيىندىقتارىنان اۋلاق بولۋ ءۇشىن مۇمكىندىگىنشە قوعامدىق كولىكتى نەمەسە شاتتل-مارشرۋتتاردى پايدالانۋعا كەڭەس بەرەمىز»، — دەپ قوستى اكىمدىكتە.