استانادا قالالىق ەلەكتر پويىزدارىن قوعامدىق كولىكتىڭ جاڭا ءتۇرى رەتىندە ىسكە قوسۋ مۇمكىندىگى قاراستىرىلۋدا. ەلوردانىڭ ساۋلەت، قالا قۇرىلىسى جانە جەر قاتىناستارى باسقارماسى بۇل باستامانىڭ بولشەكتەرى مەن بولجامدى مەرزىمىن اشىپ ايتتى، دەپ حابارلايدى infohub.kz سايتى.
بۇعان دەيىن استاناداعى جەلىگە جالپى سىيىمدىلىعى 500 جولاۋشىعا دەيىنگى بەس پويىز جىبەرۋ جوسپارلانىپ وتىرعانى حابارلانعان. كەلەشەكتە ەلەكتر پويىزدارى تاۋلىگىنە 16 مىڭ ادامعا دەيىن تاسىمالداي الادى. بۇل — LRT نەمەسە اۆتوبۋستارعا ۇقساس قوعامدىق كولىكتىڭ جاڭا ءتۇرى ەكەنى ايتىلعان.
NUR.KZ ءتىلشىسى استانانىڭ ساۋلەت، قالا قۇرىلىسى جانە جەر قاتىناستارى باسقارماسىنىڭ ءباسپاسوز قىزمەتىنە جوسپارلانعان ىسكە قوسۋ تۋرالى تولىعىراق ايتىپ بەرۋىن سۇراپ، ساۋال جولدادى. ۆەدومستۆو شەشىمنىڭ ازىرگە تۇپكىلىكتى قابىلدانباعانىن، ەلەكتر پويىزدارىن ىسكە قوسۋ نۇسقاسى ۇسىنىس مارتەبەسىندە تۇرعانىن اتاپ ءوتتى.
«ۇزاق مەرزىمدى كەلەشەكتە تەمىرجول كولىگىن قالاىشىلىك جولاۋشىلار تاسىمالىنىڭ ءبىر ءتۇرى رەتىندە دامىتۋ ءۇشىن شامامەن 2050 جىلعا قاراي قالادا ءارقايسىسىنىڭ سىيىمدىلىعى 500 جولاۋشىعا دەيىنگى بەس پويىزدى پايدالانۋ مۇمكىندىگى قاراستىرىلۋدا»، — دەدى باسقارمادا.
سونداي-اق جاڭا تەمىرجول جەلىلەرىن سالۋ قاجەت ەمەس ەكەنى اتاپ ءوتىلدى. سەبەبى ازىرگە استانا-1 — نۇرلى جول باعىتىنداعى قولدانىستاعى تەمىرجول تارماعىن پايدالانۋ مۇمكىندىگى قاراستىرىلۋدا.
كەلەشەكتە ستانسيالار نەگىزگى قالالىق ماگيسترالدارمەن قيىلىساتىن جەرلەردە، سونىڭ ىشىندە پۋشكين جانە قوشقاربايەۆ كوشەلەرىنىڭ تۇسىندا ورنالاسادى.
بۇعان دەيىن ەلەكتر پويىزىنداعى ستانسيالار قانداي بولۋى مۇمكىن ەكەنى دە حابارلانعان: قاراعاندى كولىك حابى، مۇستافين كوشەسى، پۋشكين كوشەسى، بوگەنباي باتىر داڭعىلى.