استانادا قوشقاربايەۆ داڭعىلىندا 15-20 قىركۇيەك ارالىعىندا كولىك قوزعالىسى شەكتەلەدى. بۇل تۋرالى infohub.kz سايتى حابارلايدى.
ەلوردا اكىمدىگىنىڭ مالىمەتىنشە، جوندەۋ جۇمىستارى ش. قۇدايبەردى ۇلى مەن ابىلاي حان داڭعىلدارىنىڭ ارالىعىنداعى ۋچاسكەدە جۇرگىزىلەدى. «استانادا 15-20 قىركۇيەك ارالىعىندا ر. قوشقاربايەۆ داڭعىلىندا، ش. قۇدايبەردى ۇلى مەن ابىلاي حان داڭعىلدارىنىڭ ارالىعىنداعى ۋچاسكەدە سالماق ولشەيتىن داچيكتەر استىنا اسفالتبەتون جابىن توسەۋ جۇمىستارى جۇرگىزىلەدى»، — دەلىنگەن قالا اكىمدىگىنىڭ حابارلاماسىندا.
جول جۇمىستارىنا بايلانىستى اتالعان ۋچاسكەدە كولىك قوزعالىسى ەكى باعىتتا دا جولدىڭ ءبىر جاعىمەن ۇيىمداستىرىلادى.
اكىمدىك قاۋىپسىزدىكتى قامتاماسىز ەتىپ، قولايسىزدىقتى ازايتۋ ءۇشىن جەرگىلىكتى جەردە جول بەلگىلەرى مەن كورسەتكىشتەر ورناتىلاتىنىن قوستى. «جۇرگىزۋشىلەر مەن جاياۋ جۇرگىنشىلەردەن مارشرۋتتارىن الدىن الا جوسپارلاپ، قوزعالىستى ۇيىمداستىرۋداعى ىقتيمال وزگەرىستەردى ەسكەرۋ سۇرالادى»، — دەپ اتاپ ءوتتى قالا اكىمدىگىندە.
بۇعان دەيىن استانادا جوندەۋ جۇمىستارىنا بايلانىستى نۇرماعامبەتوۆ كوشەسىندە كولىك قوزعالىسى ءىشىنارا جابىلاتىنى حابارلانعان بولاتىن.