استانادا كامەلەتكە تولماعان بالاعا قۇرىلىس الاڭىن قورشاعان پروفليست قۇلادى. مەردىگەردىڭ جاۋاپتى وكىلى اكىمشىلىك جاۋاپكەرشىلىككە تارتىلدى، دەپ حابارلايدى infohub.kz سايتى.
ەلورداداعى ءپروفليستىڭ قۇلاۋى تۋرالى Threads الەۋمەتتىك جەلىسىندە valena8602 لاقاپ اتىمەن تىركەلگەن قولدانۋشى جازدى.
«نۇرا اۋدانىندا بالاعا پروفليست قۇلادى. جاقىن ماڭداعى ۇيلەردىڭ تۇرعىندارى اكىمدىككە بىرنەشە رەت حات جازىپ، اۋداندى اباتتاندىرۋدى سۇراعان. سەبەبى ادامدار ايالداماعا قورشاۋدىڭ بويىمەن ءجۇرىپ بارادى، اينالاسى باتپاق. ءۇش جىلدان بەرى قۇرىلىس ءجۇرىپ، قازىلىپ جاتقان جەردە قاراپايىم تۇرمىس جاعدايى جوق. حالىقتىڭ داۋىسىن ەستۋ ءۇشىن وسىنداي جاعدايعا جەتۋ كەرەك پە؟» — دەلىنگەن جازبادا.
جاريالانىمعا استانا قالالىق پوليسيا دەپارتامەنتى جاۋاپ بەردى.
«قۇرىلىس نىسانىنىڭ اۋماعىن ءتيىستى دەڭگەيدە ۇستاماعانى ءۇشىن مەردىگەردىڭ جاۋاپتى وكىلى (ۋچاسكە باستىعى) اباتتاندىرۋ ەرەجەلەرىن بۇزعانى ءۇشىن اكىمشىلىك جاۋاپكەرشىلىككە تارتىلدى. وسى فاكتى بويىنشا نۇرا اۋدانىنىڭ پوليسيا باسقارماسى جاراقات العان كامەلەتكە تولماعان بالاعا قاجەتتى مەديسينالىق كومەك كورسەتىلگەنىن، ونىڭ ءومىرى مەن دەنساۋلىعىنا ءقاۋىپ تونبەيتىنىن حابارلايدى. قۇقىق قورعاۋ ورگاندارى قۇرىلىس كومپانيالارى مەن جاۋاپتى تۇلعالارعا قاۋىپسىزدىك نورمالارىن قاتاڭ ساقتاۋ جانە ىرگەلەس اۋماقتاردا ءتارتىپتى ۇستاۋ قاجەتتىگىن ەسكە سالادى»، — دەدى پوليسيادا.