استانادا تانىسىن قۇرىلىس ماتەريالدارىن ساتىپ الۋ كەزىندە الداپ، ءىرى كولەمدەگى اقشانى يەمدەنگەن كۇدىكتى ۇستالدى، دەپ حابارلايدى infohub.kz سايتى.
ىشكى ىستەر مينيسترلىگىنىڭ ۆەدومستۆولىق سايتىنىڭ مالىمەتىنشە، پوليسەيلەر كۇدىكتىنىڭ تۇلعاسىن انىقتادى. ول ازاماتتىڭ سەنىمىنە كىرىپ، قۇرىلىس ماتەريالدارىن جەتكىزۋ سىلتاۋىمەن ءىرى كولەمدەگى اقشا قاراجاتىن يەمدەنگەن.
تەرگەۋ بارىسىندا ەلوردانىڭ 44 جاستاعى تۇرعىنى زارداپ شەككەنگە قۇرىلىسقا قاجەتتى كىرپىشتى قولجەتىمدى باعامەن جانە قىسقا مەرزىمدە جەتكىزىپ بەرەتىنىن ۋادە ەتكەنى انىقتالدى. ول ءوز نيەتىنىڭ شىنايىلىعىنا سەندىرىپ، 1 ميلليون 300 مىڭ تەڭگە كولەمىندە الدىن الا تولەم جاساۋدى سۇراعان. زارداپ شەككەن اقشانى ونىڭ جەكە شوتىنا اۋدارعان.
تەرگەۋ دەرەكتەرى بويىنشا، اقشانى العاننان كەيىن كۇدىكتى ۋادە ەتكەن قۇرىلىس ماتەريالدارىن جەتكىزبەگەن. ءبىراز ۋاقىت ول ءارتۇرلى سىلتاۋلارمەن تاپسىرىستى ورىنداۋدى كەيىنگە شەگەرىپ، كەيىن زارداپ شەككەنمەن بايلانىسقا مۇلدەم شىقپاي قويعان. وسىلايشا، ول سەنىمدى تەرىس پايدالانىپ، اقشانى الاياقتىق جولمەن يەمدەنگەن.
زارداپ شەككەن پوليسياعا جۇگىنگەننەن كەيىن جەدەل-ىزدەستىرۋ ءىس-شارالارى ناتيجەسىندە كۇدىكتىنىڭ تۇلعاسى انىقتالدى. ول كىناسىن مويىندادى. وسى فاكتى بويىنشا سوتقا دەيىنگى تەرگەۋ جۇرگىزىلۋدە.
پوليسيا قازاقستاندىقتارعا ەسكەرتەدى: قۇرىلىس ماتەريالدارىن نەمەسە باسقا دا قىمبات تاۋارلاردى ساتىپ الۋ كەزىندە ساتۋشىنىڭ جەكە باسىن، ونىڭ قىزمەتىنىڭ زاڭدىلىعىن جانە ىسكەرلىك بەدەلىن مۇقيات تەكسەرۋ قاجەت.