استانادا تۇنگى ۋاقىتتا فەيەرۆەرك ۇشىرعان بىرنەشە ادام جازالاندى. ءبىر ەر ادام «بايتەرەك» ماڭىندا دوسىنىڭ بالاسىن قۇتتىقتاپ، بەس تاۋلىككە قاماۋعا الىندى، دەپ حابارلايدى infohub.kz.
استانا پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، وسى اپتانىڭ وزىندە ەلوردادا فەيەرۆەرك ۇشىرۋعا بايلانىستى قوعامدىق ءتارتىپتى بۇزۋدىڭ ءۇش دەرەگى تىركەلگەن. 22 شىلدەگە قاراعان ءتۇنى تۇرعىن ءۇيدىڭ اۋلاسىندا ءبىر توپ ادام ساليۋت ۇشىرىپ، داۋىس شىعارىپ، تۇرعىنداردىڭ تىنىشتىعىن بۇزعان. وقيعاعا قاتىسى بار التىعا جۋىق ادام انىقتالىپ، ولارعا تىنىشتىقتى بۇزعانى ءۇشىن اكىمشىلىك ءىس قوزعالدى. پيروتەحنيكانى 30 جاستاعى ايەل ۇشىرعان. ول ۇساق بۇزاقىلىعى ءۇشىن 20 اەك (86 500 تەڭگە) مولشەرىندە ايىپپۇل سالىنىپ، جاۋاپكەرشىلىككە تارتىلدى.
تاعى ءبىر دەرەك 23 شىلدەدە «بايتەرەك» مونۋمەنتى الاڭىندا تىركەلدى. وندا دا پيروتەحنيكا ۇشىرىلعانى انىقتالدى. تەكسەرۋ كەزىندە 37 جاستاعى ەر ادام دوسىن كوپتەن كۇتكەن بالاسىنىڭ دۇنيەگە كەلگەنىمەن قۇتتىقتاعىسى كەلگەنىن ءتۇسىندىردى. ونىڭ ايتۋىنشا، پيروتەحنيكانى ينتەرنەت-دۇكەننەن الدىن الا ساتىپ العان. قوعامدىق ءتارتىپتى بۇزعانى ءۇشىن ول اكىمشىلىك جاۋاپكەرشىلىككە تارتىلىپ، بەس تاۋلىككە اكىمشىلىك قاماۋعا الىندى.
تاعى ءبىر وقيعا 24 شىلدەدە قوشقاربايەۆ داڭعىلىندا تىركەلدى. وندا 24 جاستاعى جىگىت دوسىن قىز الىپ كەلگەنىمەن قۇتتىقتاۋ ءۇشىن فەيەرۆەرك ۇيىمداستىرعان. وعان قاتىستى اكىمشىلىك ماتەريالدار دايىندالىپ، شەشىم قابىلداۋ ءۇشىن سوتقا جىبەرىلدى.