استانادا مەرەكەلىك فەيەرۆەرك ۇناتاتىندار قۋانىشتىڭ ورنىنا اكىمشىلىك جازاعا تارتىلدى. ەكى ەر ادام تۇنگى ۋاقىتتا پيروتەحنيكانى قولدانعانى ءۇشىن بەس تاۋلىككە قامالدى، دەپ حابارلايدى infohub.kz.
العاشقى وقيعا ەلورداداعى قوناقۇيلەردىڭ ءبىرىنىڭ جانىندا بولدى. 50 جاستاعى ەر ادام بولاشاق كەلىنىنىڭ تۋعان كۇنىنە وراي ادەمى ساليۋت ۇيىمداستىرۋدى ۇيعاردى. الايدا مەرەكەلىك شارا ماڭايداعى تۇرعىن ءۇي كەشەندەرىنىڭ تۇرعىندارىنىڭ تىنىشتىعىن بۇزدى. استانا پوليسيا دەپارتامەنتىنىڭ قىزمەتكەرلەرى قۇقىق بۇزۋشىعا قاتىستى ۇساق بۇزاقىلىق بويىنشا اكىمشىلىك حاتتاما تولتىردى. سوت شەشىمىمەن وعان بەس تاۋلىككە قاماۋ جازاسى تاعايىندالدى.
ەكىنشى جاعداي قالانىڭ تۇرعىن اۋداندارىنىڭ بىرىندە بولدى. 26 جاستاعى جىگىت قىز ۇزاتۋ راسىمىنەن كەيىن كوپقاباتتى تۇرعىن ءۇيدىڭ جانىندا ساليۋت اتىپ، جاس وتباسىن قۇتتىقتاۋدى ءجون كوردى. مەرەكەلىك سەبەپكە قاراماستان، ونىڭ ارەكەتى دە قوعامدىق ءتارتىپتى بۇزۋ دەپ تانىلدى. سوت وعان دا وسىنداي جازا – بەس تاۋلىك اكىمشىلىك قاماۋ تاعايىندادى.
ەلوردا پوليسياسى تۇرعىن ۇيلەردىڭ جانىندا، اسىرەسە تۇنگى ۋاقىتتا پيروتەحنيكالىق بۇيىمداردى قولدانۋ ازاماتتاردىڭ تىنىشتىعىن بۇزاتىنىن جانە قاۋىپسىزدىككە ءقاۋىپ ءتوندىرۋى مۇمكىن ەكەنىن ەسكەرتەدى. قۇقىق قورعاۋ ورگاندارى قالا تۇرعىندارى مەن قوناقتارىن اينالاسىنداعىلاردىڭ دەمالۋ قۇقىعىن قۇرمەتتەۋگە جانە زاڭ تالاپتارىن قاتاڭ ساقتاۋعا شاقىرادى.