استانا تۇرعىنى تۇنگى كلۋبتاعى جانجالدان كەيىن توپتىڭ شابۋىلىنا ۇشىراعانىن حابارلادى. قىزدىڭ ايتۋىنشا، ونى جەرگە قۇلاتىپ، اياقپەن تەۋىپ، شاشىنان سۇيرەگەن، دەپ حابارلايدى infohub.kz سايتى.
Threads الەۋمەتتىك جەلىسىندەگى welobeee دەگەن اتپەن تىركەلگەن قولدانۋشى ءوز جازباسىندا استاناداعى كلۋب ماڭىندا كوشەدە وزىنە شابۋىل جاسالعانىن ايتتى. «ولار توپ بولىپ شابۋىلداپ، مەنى ۇرىپ-سوعىپ، ۆيدەوسىن تاراتتى. 15 تامىزدا مەن ءبىر جىگىتتى بايقاۋسىزدا ءتۇرتىپ الدىم دا، بىردەن كەشىرىم سۇرادىم. ءبىراق ونىڭ قىزدارىنا بۇل ازدىق ەتتى: ولار ماعان بالاعاتتاپ، "سەن نەگە سونشا كەڭسىڭ؟" دەپ قورلاي باستادى. سول جىگىت تە قوسىلىپ، ماعان قول كوتەرە باستادى. ارالاسقان كۇزەتشىلەرگە راقمەت. ءبىراق ول توپ تىنىشتالمادى. ولار كلۋب جابىلعاندا تاڭعى ساعات 6-دا مەنى كوشەدە كۇتىپ تۇرىپ، توپ بولىپ شابۋىلدادى. مەكەمەنىڭ بەينەكامەرالارىنان مەنىڭ جىعىلىپ، اياقپەن تەۋىلگەنىم، شاشىنان سۇيرەلگەنىم انىق كورىنەدى. ناتيجەسىندە: بۇكىل دەنەمدە گەماتومالار جانە جەڭىل مي شايقالۋى. وسى ۋاقىت بويى كۇزەتشىلەر ولاردى مەنەن ارەڭ اجىراتىپ ءجۇردى. ءبىراق ەڭ قورقىنىشى كەيىن باستالدى. ول جىگىت مەنى جاتقان كۇيىمدە قىزدارى ۇرىپ جاتقان ۆيدەوسىن ءتۇسىرىپ، ونى Telegram-ارنالار مەن پابليكتەرگە تاراتا باستادى»، — دەپ جازدى ول.
قازاقستاندىقتىڭ ايتۋىنشا، جانجالداسقان ادامدار وعان الەۋمەتتىك جەلىلەردە جازىپ، پوليسياعا بەرگەن ارىزىن قايتارىپ الۋدى تالاپ ەتىپ جاتىر. بۇل جاريالانىمعا استانا پوليسيا دەپارتامەنتى جاۋاپ بەردى. «ەسىل اۋدانىنىڭ پوليسيا باسقارماسى دەنە جاراقاتىن سالۋ فاكتىسى بويىنشا سوتقا دەيىنگى تەرگەۋ باستادى. قازىرگى ۋاقىتتا قاجەتتى تەرگەۋ ارەكەتتەرى جۇرگىزىلىپ، ساراپتاما تاعايىندالدى. وسى قۇقىق بۇزۋشىلىققا قاتىسى بار بارلىق ادامداردى انىقتاۋ شارالارى قابىلدانۋدا. تەرگەۋ مۇددەسىنە بايلانىستى وزگە مالىمەتتەر جاريا ەتىلمەيدى»، — دەلىنگەن حابارلامادا.